Предложените царини на Европската унија за кинески стоки „не се казна“, изјави денеска германскиот министер за економија Роберт Хабек на кинеските власти во Пекинг.
Посетата на Хабек на Кина е прва од страна на висок европски функционер откако Брисел предложи високи царини за увоз на кинески електрични возила (ЕВ), чија цел е борба против она што ЕУ го смета за прекумерни субвенции.
Денеска, пред пристигнувањето на Хабек, Кина предупреди дека ескалацијата на несогласувањата со ЕУ во врска со електричните возила може да предизвика трговска војна.
„Важно е да се разбере дека тоа не се казнени тарифи“, рече германскиот министер на првата пленарна седница од дијалогот за климата и трансформацијата.
„Европа ги прави работите поинаку“
Земјите како САД, Бразил и Турција користеа казнени царини, но не и ЕУ, посочи Хабек, додавајќи дека „Европа ги прави работите поинаку“.
Тој рече дека девет месеци Европската комисија детално истражувала дали кинеските компании ги користеле субвенциите на нефер начин.
Секоја мерка за компензација што произлегува од ревизијата на ЕУ „не е казна“, рече министерот, додавајќи дека целта на таквите мерки е да се компензираат предностите што Пекинг им ги обезбеди на кинеските компании.
Што велат Кинезите?
На состанокот со Џенг Шанџи, претседател на кинеската Национална комисија за развој и реформи, Хабек рече дека предложените тарифи на ЕУ имаат за цел да ги изедначат условите за игра за Кина.
„Ќе направиме се за да ги заштитиме кинеските компании“, одговори Женг.