Европската Унија постигна договор за 18-тиот пакет санкции против Русија, кој предвидува низа мерки насочени против руската нафтена и енергетска индустрија, објави високата претставничка на ЕУ за надворешна политика и безбедност, Каја Калас.
Таа напиша на Платформа X дека ЕУ штотуку одобрила еден од своите најсилни пакети санкции против Русија досега.
Калас изјави дека целта на санкциите е да се направи запирањето на агресијата против Украина единствениот пат за Русија.
Минатиот месец, Европската комисија предложи 18-ти пакет санкции против Русија поради нејзината инвазија на Украина во 2022 година, насочени кон приходите од енергија на Москва, банките и воената индустрија.
Предложениот пакет вклучуваше променлива граница на цената на руската нафта на 15 проценти под просечната пазарна цена на суровата нафта во претходните три месеци, изјавија претходно дипломати од ЕУ.
Предлогот, исто така, забранува трансакции со руските гасоводи „Северен тек“, а забраната се однесува и на банките вклучени во заобиколување на санкциите.
Словачка досега неколку пати стави вето на пакетот за да се обиде да добие отстапки за посебен план за постепено укинување на руската нафта и гас, кој, за разлика од санкциите, не бара едногласна поддршка од земјите од ЕУ.
Сепак, премиерот на таа земја, Роберт Фицо, синоќа изјави дека Словачка денес ќе престане да го блокира усвојувањето на 18-от пакет санкции на Европската унија против Русија, бидејќи, како што изјави, тоа би било контрапродуктивно во моментов.
Малта претходно изрази резерви во врска со предложеното ограничување на цената на руската нафта, но владата на земјата, според европските дипломати, денес објави дека ќе ги поддржи новите санкции.