Европската комисија објави нови мерки, вклучително и удвојување на царините за увоз на челик, за да ги заштити своите производители од растечката кинеска конкуренција што се смета за неправедна.
Европската комисија има намера прво да ги преполови квотите за бесцарински увоз на челик од земји надвор од ЕУ, напиша потпретседателот на Комисијата, Французинот Стефан Сежурн, на платформата X.
Дополнително, увозот што ги надминува тие квоти ќе биде предмет на удвоени царини, кои ќе се зголемат „од 25 на 50 проценти“, рече Сежурн.
Овие царини ќе достигнат нивоа слични на оние што се применуваат во САД и Канада, според предлозите на Комисијата, кои треба да бидат потврдени од 27-те земји-членки и Европскиот парламент.
– Овој нов план за спасување на нашите производители на челик и нашите европски работни места има за цел да ја замени заштитната клаузула што ЕУ ја воведе во 2019 година за да им помогне на европските производители, која истекува во средината на 2026 година – рече Сежурн.
Тој додаде дека европската челична индустрија е на работ на колапс, објавува SEEbiz.
– Ќе го заштитиме за да може повторно да стане конкурентен – рече тој.
ЕУ, исто така, преговара со Вашингтон за ослободување од царини за европски челик.
Целта е Европа и САД да се поддржуваат меѓусебно за подобро да се спротивстават на кинеската конкуренција.
Минатата година, Кина произведе повеќе од 1.000 милиони тони челик, повеќе од половина од светското производство, далеку пред Индија (149 милиони), Јапонија (84 милиони) и САД (79 милиони), според податоците од Светската организација за трговија со челик.
Европските земји се послаби – Германија произведе само 37 милиони тони, Шпанија 12, а Франција помалку од 11.
Со години, европските производители беа длабоко дестабилизирани од конкуренцијата од масовно субвенционираните кинески производители на челик.
И така тие го носат товарот на вишокот капацитет што го одржува Пекинг, што ги намалува глобалните цени.
Со вртоглавиот раст на цените на енергијата поради војната во Украина и слабата побарувачка во Европа (што одразува тешкотии во сектори како што се автомобилската и градежната индустрија), неправедните практики на Кина ги турнаа европските производители на челик во минус, според ЕУ.