Поради полнотата на своите магацини, Европската унија почна да распоредува вишок залихи на гас во Украина, каде во моментов има повеќе од две милијарди кубни метри гас на компании од ЕУ.
Како што пишува „Фајненшл тајмс“, Украина, и покрај борбите на земјата, стана интересна дестинација за складирање гас, бидејќи на клиентите им нуди евтини тарифи и тригодишно ослободување од давачки, што овозможува лесно реувоз на гас во ЕУ.
Според украинската енергетска компанија „Нафтогас“, складиштата за гас се наоѓаат длабоко под земја, најмногу на западот на Украина и далеку од линијата на фронтот, пренесува Танјуг.
Целта на Брисел беше постигната во средината на август
Здружението на оператори со гасна инфраструктура на Европа (GIE) објави дека исполнетоста на капацитетите за складирање гас во Европа на 30 октомври изнесува 99,24 отсто.
Целта на Брисел беше до 1 ноември магацините да се наполнат со гас до 90 отсто, но тоа веќе беше постигнато во средината на август.
Меѓународната агенција за енергија (ИЕА) претходно соопшти дека Европа би можела да наполни речиси 100 отсто од складиштето на гас, но студената зима, и покрај толку високите залихи, може да доведе до нестабилност на пазарот.
ИЕА наведува дека резервите на гас во европските складишта би можеле да паднат под критичното ниво од 20 отсто до крајот на грејната сезона.