Властите во голем број земји ги засилија безбедносните мерки околу еврејските локации во Франција, Германија и Обединетото Кралство во саботата и неделата, поради конфликтот меѓу Израел и Хамас.
Во меѓувреме, демонстрации за поддршка на Палестинците се одржаа во неколку земји од Блискиот Исток.
Никој не очекуваше што се случи со Израел во саботата наутро кога членовите на Хамас извршија ракетни напади, а потоа го нападнаа јужниот дел на Израел.
Тие вршеа рации во израелски градови и киднапираа цивили и војници, а повеќе од 100 од нив се киднапирани и се верува дека се во Појасот Газа.
Во борбите загинаа стотици луѓе, а беа повредени и многу илјади.
Ракетните напади врз Израел во 21 век не се ништо ново.
Сепак, овој интензитет на напади не е забележан од војната во Јом Кипур во 1973 година.
Франција
Безбедноста беше засилена во саботата околу местата за богослужба и еврејските образовни институции во Франција, особено во Париз и неговите предградија.
Овој потег дојде и покрај најавата на министерот за внатрешни работи Гералдо Дарманин, кој инсистираше на тоа дека „нема закана“ во моментот.
Безбедноста веќе беше засилена во средината на септември со почетокот на еврејската Нова година обележана со прославата на неколку празници во септември и октомври.
Германија
Германија ја засили безбедноста околу зградите на еврејската заедница и израелската амбасада по нападот на Хамас врз Израел, изјави во саботата германската министерка за внатрешни работи Ненси Фесер за весникот „Билд“.
Германските власти, исто така, внимателно ги следат „потенцијалните поддржувачи на Хамас во исламистичката сфера“, рече министерот.
Обединето Кралство
Лондонската полиција во неделата ги засили патролите во делови од британскиот главен град по „инцидентите“ поврзани со војната меѓу Израел и Хамас, а министерот за внатрешни работи повика на „нулта толеранција“ кога станува збор за „глорификација на тероризмот“.
„Полицијата ги засили патролите во делови на Лондон за да обезбеди видливо присуство и да ги увери нашите заедници“, соопшти Метрополитен полицијата.
Државниот секретар за имиграција Роберт Џенрик сподели видео на социјалната мрежа Х на кое се гледа како луѓето веат палестински знамиња на улица и свират во автомобилите.
Поддршка за Палестинците на Блискиот Исток
Во саботата и неделата во Турција, Ирак, Иран, Сирија, Либан и Јемен се одржаа демонстрации за поддршка на Палестинците.
Иран
Во Иран, земја чиј претседател рече дека ја поддржува „легитимната одбрана на палестинската нација“ и го смета Израел за „одговорен“, неколку стотици луѓе демонстрираа во неделата во неколку големи ирански градови, вклучително и нејзиниот главен град Техеран, веејќи го палестинското знаме.
Во Техеран на големи плакати пишуваше: „Големата операција за ослободување започна“, додека израелските знамиња беа запалени.
На улиците, возачите со палестински знамиња свиреа за да ја изразат својата радост, а на неколку локалитети беше поставен огномет – според официјалната агенција ИРНА.
Либан
Во Либан, Хезболах во неделата одржа митинг во своето упориште во јужните предградија на Бејрут за поддршка на палестинската офанзива.
Висок член на либанското движење, Хашем Сафиедин, им оддаде почит на „хероите на Газа“ и потврди дека „дојде времето на одмаздата“.
Тој беше поздравен од неговите приврзаници кои скандираа „Смрт за Израел“.
Сирија
Во Дамаск, младите, наводно, делеа пецива на централниот плоштад на сириската престолнина во знак на прослава.
Турција
Илјадници Турци учествуваа на маршот во Истанбул за поддршка на Палестинците.
„Палестинскиот народ само ја брани својата татковина, тоа нема никаква врска со тероризмот“, изјави за АФП Сахин Окал (54), активист од едно од здруженијата кои го организираа маршот.
Јемен
Во Сана, демонстрантите се собраа во знак на поддршка на Палестинците и ги запалија израелските и американските знамиња.
Милицијата Хути, поддржана од Иран и под контрола на Сана, извикуваа „Смрт за Америка, смрт за Израел“.
Ирак
Демонстрации за поддршка на Палестинците се очекуваат доцна во недела во шиитскиот свет град Карбала.
Во саботата, околу 100 демонстранти се собраа во главниот град Багдад, на централниот плоштад за да ја прослават офанзивата на Хамас, веејќи палестински знамиња.
Демонстрантите газеа и палеа израелски знамиња и извикуваа „не за САД, не за Израел“.