Турскиот претседател Реџеп Таип Ердоган во вторникот ги критикуваше европските и западните земји за заштита на „терористичките“ организации, вклучително и Курдистанската работничка партија (ПКК) и движењето на имамот Фетулхах Ѓулен, кој се наоѓа во егзил во САД.
„Додека ние уништуваме гнезда на терор, членовите на терористичките организации отворено си поставија кампови во некои други земји. Убијците кои ја пролеаја крвта на нашите граѓани се прифатени во речиси сите европски земји, особено во логорот Лаврион во Грција. Тие можат слободно да одат таму“, рече тој на митинг во седиштето на турската владејачка Партија на правдата и развојот (АК Партија) во Анкара.
Овие изјави на Ердоган дојдоа еден ден откако еден полицаец беше убиен, а друг повреден во напад на ПКК врз полициска станица во јужната турска провинција Мерсин, јавува Анадолија.
„Терористите претставуваат закана за мирот и безбедноста на западните земји кои ги штитат терористичките групи“, предупреди тој и додаде дека очекува сите земји, особено соседите на Турција, „да ги преземат неопходните мерки против терористичките организации“.
„Нашата моќ е далеку над нивната“
Во врска со воените активности на Грција, Ердоган рече дека „Турција многу добро ги знае намерите на оние кои ја испровоцираа Атина“.
„Оружјето акумулирано во Западна Тракија и на островите не ни значи ништо, бидејќи нашата моќ е далеку над нив, но ве потсетуваме дека тоа значи прикриена окупација“, рече тој.
Ердоган рече дека Турција не сака Егејското и Средоземното Море да бидат заматени со човечка крв, солзи или непријателство.
Сакаме мир и спокојство со сето срце“, заклучи Ердоган.