Електрични апарати и цигари запленети на ГП Табановце (фото)

Во текот на минатата недела, царинските службеници открија две измами, еден обид за нелегален влез на мигранти и повеќе обиди за криумчарење разна стока, при што привремено биле задржани готови пари, лекови, делови за мобилни телефони, технички производи, свежа риба, соја, безалкохолни пијалоци, цигари, облека и фалсификати.

Според извештајот на Царинската управа на Република Македонија, три употребувани електрични апарати биле откриени при контрола на македонски автомобил, управуван од македонски државјанин, пријавен за влез во државата на граничниот премин Табановце автопат. Непријавените производи, пронајдени во багажникот на возилото, покриени со личниот багаж на патниците, биле привремено задржани, а против возачот поведена прекршочна постапка.

При контрола на швајцарско патничко комбе, управувано од македонски државјанин, а пријавено за излез од Македонија на граничниот премин Табановце автопат, биле откриени и запленети вкупно 32 штеки цигари, со македонски акцизни маркички. Непријавените цигари, пронајдени под тапацирот на страничните делови од конструкцијата на возилото, во кутија со ланци, во кутија со јаболки и помеѓу багажот на патниците се привремено задржани. Како што велат од Царинската управа, против возачот кој се пријавил како сопственик на цигарите, ќе биде поведена прекршочна постапка.