Поради зголемената опасност од руска саботажа врз критичните инфраструктурни објекти во земјите од Европската Унија и две диверзии на железницата Варшава-Лублин, Полска од полноќ испраќа 10.000 војници да ги чуваат железниците, во операцијата Хоризонт, објавија властите.
Операцијата Хоризонт и вклучувањето на армијата во заштитата на клучната полска инфраструктура е реакцијата на владата на премиерот Доналд Туск на двете диверзии на железницата Варшава-Лублин, за кои обвинителството обвини двајца украински државјани, според истрагата, соработници на руските разузнавачки служби.
„Имаме многу железници во Полска и физички е невозможно армијата да заштити сè. Мораме да ги дефинираме клучните области за функционирање на државата и за испраќање помош во Украина“, рече генералот Кшиштоф Крул за операцијата Хоризонт, во која околу 10.000 војници ќе соработуваат со полицијата и Железничката стража во обезбедувањето на железниците.
Припадници на Територијалната одбрана се исто така на терен, а заедно со војниците, воени беспилотни летала и армиски хеликоптери, заедно со полицијата, ќе патролираат по железничките пруги.
„Војниците ќе бидат на најважните сообраќајни крстосници, кои се приоритет. Едноставно мора да бидеме видливи. Да бидеме видливи е исто така елемент на таа операција. Нејзината цел е да ги предупреди и одврати терористите кои се финансирани и добиваат наредби од нашите противници од Исток да се вклучат во какви било напади врз нашата инфраструктура“, изјави генерал Крул за новинската агенција ПАП.
Минатиот викенд, на железничката линија Варшава-Лублин, која е исто така клучна за транспорт на западна помош во Украина, дел од шините беа разнесени со експлозив на едно место, додека на друго, воз со речиси 500 патници беше запрен во неделата бидејќи наиде на 60 метри уништени далноводи.
Двајца Украинци, едниот веќе осуден во Лвов за саботажа во фабриката за беспилотни летала, а другиот жител на Донбас кој живее во Белорусија, влегле во Полска, според полската истрага, оваа есен пред саботажата и веднаш по неа избегале во Белорусија.
Полскиот премиер Доналд Туск и украинскиот претседател Володимир Зеленски се согласија итно да формираат посебно тело за размена на разузнавачки и полициски податоци, за да не се случи терористи и платеници на Русија со украинско државјанство да влезат во Полска без проблеми само затоа што Украина не ги предала податоците на Полска или не распишала потерница преку Интерпол.
Вчера, Полска во нота побара од Русија и Белорусија да ги екстрадираат обвинетите директни извршители на саботажа на железницата, додека најмалку четворица нивни соучесници беа уапсени во Полска.
Зборуваме за 41-годишниот Украинец Евгениј Иванов, осуден во мај во Лавов за учество во операцијата за поставување експлозиви во воена фабрика за беспилотни летала минатата година по наредба на руската разузнавачка служба ГРУ, и украинскиот државјанин Олександр Кононов, од Донбас.