Во близина на населбата Цебјен кај Вроцлав на југот на Полска е пронајден дрон, најверојатно американско воено беспилотно летало кое се урнало во шума, а истрагата ја води Воената жандармерија, јавуваат полските медиуми.
Падот на дронот го пријавил Полјак кој одел во близина, а пожарникарите, полицијата и воената полиција набрзо во шумата пронашле летало без екипаж со распон на крилата од 8 метри.
„Еден човек пријавил дека видел нешто како паѓа, можеби мал авион, можеби дрон. Противпожарната единица излегла на терен и ја започнала потрагата. Се појавил и претставник на американската армија кој информирал дека објектот е нивен. Го најдоа заедно“, изјави за полската приватна телевизија „Полсат“ Пјотр Пиларчик, портпарол на локалната противпожарна бригада.
Како што рече Пиларчик, станува збор за беспилотно летало чиј пад не загрозил ничиј живот бидејќи се урнал во ненаселена област.
„Полицијата е информирана, но истрагата е препуштена на Воената жандармерија“, изјави портпаролката на регионалната полиција Ана Кублик-Рошчишевска.