Американската фармацевтска компанија Фајзер потпиша договор од 5,29 милијарди американски долари со владата во Вашингтон за испорака на 10 милиони третмани од своите антивирусни таблети за лекување на КОВИД-19 почнувајќи од оваа година.
Пред два дена, Фајзер побара „зелено светло“ во САД за својот лек Paxlovid, наведувајќи дека ќе произведе 180.000 третмани до крајот на следниот месец и најмалку 50 милиони третмани до крајот на 2022 година.
„Овој ветувачки третман може да ни помогне да го забрзаме закрепнувањето од оваа пандемија нудејќи уште една алатка за спасување животи за луѓето кои страдаат од КОВИД-19“, рече Ксавиер Бецера, секретар на Министерството за здравство на САД.
Оралната медицина би можела да биде ветувачко ново оружје во борбата против пандемијата, бидејќи може да се земе како ран третман дома, за да се спречат хоспитализирања и смртни случаи поради КОВИД-19.
Компанијата на почетокот на овој месец соопшти дека лекот ја намалил за 89 отсто шансата за хоспитализација или можноста за смрт кај возрасните кои се изложени на ризик да развијат тешки симптоми на болеста.