Алјаска, Хаваи и западниот брег на континенталниот дел на САД се соочуваат со постојана закана поради нивната близина до зоните на катастрофа – а Западниот брег штотуку доби ново предупредување.
Нова студија објавена во „Зборникот на трудови на Националната академија на науките“ откри дека земјотрес може да се случи по должината на зоната на субдукција Каскадија, расед што се протега од северниот остров Ванкувер до ’ртот Мендосино во Калифорнија.
Истражувачите од Вирџинија Тек утврдија дека потенцијално силен земјотрес, во комбинација со зголемување на нивото на морето, би можел да предизвика мегацунами што најтешко би ги погодило луѓето и имотот во северна Калифорнија, северен Орегон и јужен Вашингтон.
Мегацунами е катастрофален бран предизвикан од ненадејно движење на океанската вода, а причините можат да бидат земјотреси, лизгање на земјиштето или вулкански ерупции.
Експертите истакнуваат дека постои 15 проценти веројатност дека овој расед ќе предизвика земјотрес со јачина од 8 или повеќе степени во следните 50 години, што би можело да предизвика потонување на брегот до 2 метри.
„Проширувањето на зоната на поплавување по земјотрес во зоната на субдукција Каскадија не е квантифицирано досега, а влијанијата врз користењето на земјиштето би можеле значително да го продолжат времето на закрепнување“, рече Тина Дура, главен автор на студијата и доцент на Одделот за геолошки науки на Технолошкиот универзитет во Вирџинија.
Алјаска продолжува да биде жариште на лизгање на земјиштето поради нејзиниот суров терен и честите земјотреси, а со климатските промени и топењето на глечерите, падините стануваат сè понестабилни, предизвикувајќи одвојување на карпите, според „Дејли меил“.
На Хаваи, вулканските острови имаат долга историја на мега цунами предизвикани од уривање на вулкани.
Пред околу 105.000 години, бран висок приближно 300 метри го погодил островот Ланаи.
Вулканите на Хаваи растат со таложење слоеви лава, што може да доведе до нестабилни падини кои можат да се срушат, особено за време на вулкански ерупции или земјотреси.
Ова може да предизвика масовни свлечишта во океанот, поместувајќи огромни количини вода и создавајќи мега цунами.
Бидејќи вулканите на Хаваи остануваат активни, постои значителна закана, особено на југоисточната страна од Големиот Остров, каде што моментално се активни „младите“ вулкани како Мауна Лоа и Килауе.
Килауеа исфрла лава со месеци, а неговата последна ерупција заврши на 16 мај.
На Западниот брег, зоната на субдукција Каскадија останува една од најсилните сеизмички области во Северна Америка – и постои голема веројатност дека областа ќе биде погодена од уште еден голем земјотрес во наредните децении.
Зоната на субдукција на Каскадија е дел од Огнениот прстен, каде што Тихоокеанската плоча се судира со друга тектонска плоча, предизвикувајќи некои од најсилните земјотреси во светот, како и повеќето вулкански ерупции.
Сепак, авторите на студијата забележуваат дека земјотрес од над 8 степени според Рихтеровата скала не е регистриран во овој регион од 26 јануари 1700 година.
„Каскадија е уникатно место. Не е густо населено, но повеќето естуари имаат заедници и сите се наоѓаат во зоната на потопување“, рече Дура.
„Искрено, мислам дека потонувањето тука би можело да има повеќе последици отколку што има со други големи земјотреси во светот.“