Денеска, (05.05.2022) министерот за внатрешни работи Оливер Спасовски оствари билатерална средба со Извршен директор на Европската Агенција за спроведување на законот (Европол), Кетрин Де Бол, Жан Филип Лекуфе, Заменик извршен директор за операции, Илија Пулов, Виш советник и Андреј Грошељ, Началник на тим.
На средбата министерот Спасовски упати благодарност до директорката Де Бол за посетата на Република Северна Македонија и Министерството за внатрешни работи, а по повод Регионална конференција на Директори на полиции од регионот на Западен Балкан, при што двајцата соговорници заеднички се согласија дека оваа средба е уште една потврда за веќе сработеното, но и поттик за отворање на нови можности за соработка, со надеж за продлабочување на соработката во повеќе области од заеднички интерес како што се спречувањето на недозволена трговија со дрога, шверц со оружје борбата против илегална миграција, борба против корупција, како и сајбер безбедност како форма на современ безбедносен предизвик.
Од страна на директорката на Европол, Де Бол, беше изразено задоволството од соработката помеѓу нашата држава и Европол и посочи дека Северна Македонија и Министерството за внатрешни работи се сериозен партнер во борбата против криминалот, а воедно истакна дека нашата држава е прва земја потписничка на Договорот за оперативна и стратешка соработка. Воедно, таа информираше за формирањето на нов сектор за економски криминал во Европол, што значи зголемени можности и алатки за финансиски истраги, што ќе биде од исклучителна важност и на иста линија со новиот Оддел за финансиски криминал при МВР, формиран 2017 година и кој бележи одлични резултати, факт којшто го истакна и поздрави директорката Де Бол – Северна Македонија бележи последна конфискација од 32 милиони евра. На крајот директорката Де Бол упати честитки по повод 7 Мај – Денот на македонската полиција.
