Градоначалникот на Куманово, Максим Димитриевски, оствари работна средба со делегација од Израел, на која беа разгледани можностите за воспоставување партнерска соработка меѓу градовите Еилат, Хаифа и Куманово.
Фокусот на средбата беше ставен на можностите за реализација на заеднички проекти во областа на прехранбената индустрија и агробизнисот, како и на вклучувањето на локалните компании во идни економски иницијативи.
– Разгледани беа и можностите за размена на искуства и привлекување инвестиции преку институционална и бизнис соработка на локално ниво, информираше градоначалникот Димитриевски.
Како што беше истакнато, од средбата произлегле конкретни идеи и предлози за проекти кои, според оценките на учесниците, би имале значајно влијание врз економскиот развој и подобрување на квалитетот на животот на граѓаните од двете страни.
Израелската делегација беше составена од Мајкл Голдштајн и Ејал Ашкенази, а на средбата присуствуваше и почесниот конзул на Израел, Градимир Шумковски.
Во разговорите учествуваа и претставници на локалната самоуправа и институциите, меѓу кои претседателката на Советот Ивана Ѓорѓиевска, претставници од Секторот за меѓународна соработка и евроинтеграции, како и претставници на локалната бизнис заедница.
Никола Ивановски