Гладот меѓу Палестинците во опколениот Појас Газа се влошува, соопштија хуманитарните агенции, додека Генералното собрание на Обединетите нации се подготвува денеска да гласа за итен хуманитарен прекин на огнот во двомесечниот конфликт меѓу Израел и Хамас.
Стотици цивили се убиени во израелскиот напад врз Газа откако САД ставија вето на резолуцијата на Советот за безбедност во петокот со која се повикува на прекин на огнот.
Повеќето од 2,3 милиони жители на Газа се протерани од своите домови, а жителите велат дека е невозможно да се најде засолниште или храна во густо населената крајбрежна енклава.
„Гладот им се заканува на сите“
Светската програма за храна на ОН соопшти дека половина од населението гладува.
„Гладот им се заканува на сите“, објави УНРВА, телото на ОН одговорно за палестинските бегалци, на социјалната платформа X.
Жителите на Газа велат дека луѓето, принудени да бегаат, умираат од глад и студ, како и од бомбардирање, опишувајќи го грабежот на камиони за хуманитарна помош.помош и вртоглаво високи цени, пренесува Хина.
Израел вели дека неговите упатства до луѓето да се преселат се меѓу мерките што ги презема за заштита на цивилите додека се обидува да ги искорени милитантите на Хамас кои убија 1.200 луѓе и зедоа 240 заложници во прекуграничен напад врз Израел на 7 октомври.
Оттогаш, околу 100 заложници се ослободени.
Газа: Досега се убиени 18.205 луѓе
18.205 луѓе се убиени, а речиси 50.000 се ранети во израелските одмазднички напади врз Газа, според Министерството за здравство на Газа.
Генералното собрание на Обединетите нации составено од 193 членови најверојатно ќе усвои резолуција во вторник што го отсликува јазикот што САД го блокираа во 15-члениот Совет за безбедност минатата недела.
Резолуциите на Генералното собрание не се обврзувачки, но имаат политичка тежина и одразуваат глобални погледи.
Некои дипломати и набљудувачи предвидуваат дека гласањето ќе добие поголема поддршка од повикот на собранието во октомври за „итно, трајно и одржливо хуманитарно примирје“.