Делегација на палестинската милитантна група Хамас денес патува во Каиро како дел од напорите за продолжување на преговорите за прекин на огнот во Појасот Газа, објави катарскиот весник „Ал-Араби Ал-Џадид“.
Весникот објави дека делегација на Хамас, предводена од лидерот на групата во Појасот Газа, Калил ал-Хаја, ќе пристигне во Каиро како дел од напорите за обновување на преговарачкиот канал меѓу Хамас и Египет за постигнување договор за прекин на огнот во Газа.
Се вели дека Турција, исто така, помогнала во обновувањето на контактите меѓу Египет и Хамас.
Не е потврдено од други извори дека делегацијата на Хамас ќе патува во Каиро, објави „Тајмс оф Израел“.
„Тврдењата на израелскиот премиер Бенјамин Нетанјаху претставуваат очаен обид да се оправда Израел откако уби повеќе од 61.400 Палестинци во Газа, вклучувајќи 18.000 деца“, соопшти милитантната палестинска група Хамас синоќа.
Реагирајќи на изјавите на израелскиот премиер на прес-конференцијата. Хамас изјави дека израелскиот премиер се обидува да ги „оправда воените злосторства“ и да ги искриви фактите, додавајќи дека неговата употреба на терминот „ослободување“ е обид да се искриви реалноста на окупацијата „која нема да го прикрие злосторството на истребување, убивање и систематско уништување повеќе од 22 месеци“, објавува Ал Џезира.
Неговите зборови дека не сака да ја окупира Газа се само измама што ги крие неговите планови за присилно раселување, уништување на средствата за живот и инсталирање на влада подредена на него, се вели во соопштението.
Хамас, исто така, изјави дека Нетанјаху користи заложници за да ја продолжи војната и дека неговите тврдења за дозволување големи количини помош во Газа се лажни, бидејќи помошта што доаѓа покрива помалку од 10 проценти од потребите на гладната енклава.
Израелскиот премиер Бенјамин Нетанјаху разговараше со претседателот на Соединетите Американски Држави, Доналд Трамп, за новите планови на Израел за офанзивата во Газа, објави синоќа канцеларијата на израелскиот премиер.
Двајцата претставници разговараа за плановите на Израел да ја преземе контролата врз преостанатите упоришта на Хамас во Газа за да се стави крај на војната со ослободување на заложниците и пораз на Хамас, соопшти канцеларијата на Нетанјаху, според Ројтерс.
Порано вчера, Нетанјаху на странска прес-конференција повтори дека целта на израелската армија е да го елиминира Хамас и да преземе „безбедносна контрола“ над Појасот Газа, вклучително и воспоставување „безбедносна зона“ на границата со енклавата.
Тој ги истакна „петте принципи за завршување на војната“, вклучувајќи разоружување на Хамас, ослободување на израелски затвореници, демилитаризација на Појасот Газа, воспоставување безбедносна контрола над енклавата и воспоставување неизраелска цивилна мировна администрација.
Тој изјави дека Израел „нема друг избор“ освен да ја „заврши работата и да го порази“ Хамас, додавајќи дека израелската армија мора да ги освои „последните две упоришта на Хамас“, едното во градот Газа, а другото во земјите во централна Газа, во близина на бегалскиот камп Ал Маваси.
„Тоа е најдобриот начин да се стави крај на војната и сакам тоа да се направи“, рече Нетанјаху.
Тој рече дека не сака да ја „продолжи војната“ бидејќи тоа би довело до тоа израелските заложници да „умрат од глад“.