Кира Пендергаст зборува со илјадници тинејџери секоја година како едукатор за сајбер-безбедност.
Таа знае на што се изложени на интернет – пораки, малтретирање, сексуална изнуда, закани – но ништо не ја подготвило за непријателството со кое неодамна се соочила во просторија полна со ученици на 12 и 13 години.
Таа требала да одржи три предавања во едно австралиско училиште, но по само неколку минути од првата сесија на предавање, група момчиња почнале да извикуваат навреди за жените вклучени во нејзината презентација, кои се вообичаени меѓу мизогините онлајн инфлуенсери.
Наставниците се обиделе да ги замолчат, а потоа девојката во првиот ред изговорила коментар полн со пцовки поради кои Пендергаст се скршила и во солзи истрчала од собата, пишува CNN.
„Не можам да верувам дека плачам овде. Верувам дека однесувањето на кое бев сведок денеска беше целосно поттикнато од работите што ичениците ги виделе на интернет. Всушност, сигурна сум дека е така и дека треба да се промени“, рече Пендергаст во селфи видео снимено набргу потоа во нејзиниот автомобил.
View this post on Instagram
Пендергаст е основач и извршен директор на глобалната компанија за едукација за сајбер безбедност Safe on Social, и таа еднаш се спротивстави на забраната на социјалните мрежи за деца, но сега се согласува.
„Поминав низ апсолутно секој аргумент и имав контра-аргумент за секој. И тогаш јас сфати дека едноставно треба да се забрани“.
Австралиската влада се надева дека оваа недела ќе биде првата во светот што ќе донесе закон со кој се дозволува бришење на корисничките сметки на социјалните мрежи – вклучувајќи ги Snapchat, TikTok, Facebook, Instagram, Reddit и X од уредите на деца под 16 години.
Доколку законот биде усвоен, судовите би можеле да наметнат казни до 32 милиони долари за компаниите за социјални медиуми за кои ќе се утврди дека не презеле разумни чекори за да ги спречат децата да ги користат нивните услуги.
Владата не им кажува на технолошките компании како да го направат тоа, но очекува тие да ја прифатат технологијата за верификација на возраста.
Тоа предизвикува загриженост за приватноста што владата рече дека ќе ги реши преку законодавството.
Критичарите се скептични
Но, критичарите остануваат скептични. Тие велат дека тоа е избрзан, политички мотивиран закон пред парламентарните избори, кој може да ги турне децата-престапници подлабоко во нерегулираните области на интернетот.
Поддржувачите на законот велат дека вреди да се донесе доколку спаси еден живот.
Во последните месеци, уште две млади девојчиња се приклучија на растечката листа на деца кои си ги одзеле животите откако биле злоставувани на интернет.
Шарлот О’Брајан почина во септември, по што следеше Ела Катли-Крофорд – и двете на возраст од 12 години – и нивните семејства велат дека биле цел на насилници кои ги исмевале на Snapchat.
Во случајот на Ела, други девојки наводно ја измамиле преправајќи се дека е некој друг на апликацијата и ги ширеле приватните снимки што ги испраќала.
„Малтретирањето на социјалните мрежи е реално“, напиша нејзиното семејство со задебелени букви на страницата GoFundMe, формирана за да собере пари за нејзиниот погреб.
Родителите на Шарлот, Метју Хауард и Кели О’Брајан се приклучија на кампањата за забрана на социјалните мрежи за помлади од 16 години.
Тие постапуваат по последното барање на Шарлот – апел за подигање и ширење на свеста за злоупотребата на интернет.
Тие отпатуваа во Канбера за да му поднесат на премиерот петиција потпишана од 124.000 луѓе – најголемата во светот на оваа тема – во која се повикува на зголемување на старосната граница за социјалните мрежи од 13 на 16 години.
„Сите грешки што ги прават веднаш се пренесуваат на целата група“
Д-р. Даниел Ајнштајн, клинички психолог и автор, вели дека училиштата се движат низ минско поле на интеракции што се одвиваат на интернет, надвор од училишните часови, на платформи надвор од нивниот дофат.
„Наставниците се под голем притисок да се осврнат на фактот дека културата е поткопана од социјалните мрежи, ова е вид на злонамерно однесување кое суптилно е дозволено да постои само затоа што е тешко да се запре“.
Ајнштајн поддржува забрана на социјалните мрежи бидејќи верува дека мобилните телефони и групните разговори ги заменуваат интеракциите лице в лице кои ги учат децата како да се поврзат со луѓето и да ги решаваат конфликтите.
„Сите грешки што ги прават веднаш се пренесуваат до целата група. Немам можност да ги направам тие мали грешки без тие да не станат важни“.
Договорот меѓу главните политички партии не е многу вообичаен во Австралија, но по ова прашање тие претставуваат обединет фронт.
Опозициската Либерална партија во јуни предложи старосна граница за социјалните мрежи, што беше поддржано од премиерот, а потоа и од сите федерални и провинциски функционери.
„Сакам да разговарам со австралиските родители. Премногу често социјалните мрежи воопшто не се социјални и сите го знаеме тоа. Вистината е дека им штети на нашите деца и мораме да го запреме тоа“, рече премиерот Ентони Албанес во видеото објавено на Инстаграм, една од целите на забраната.
Дени Елачи и неговата сопруга пред неколку години попуштија на барањата на нивната ќерка да го користи стариот мобилен телефон. Таа тогаш имаше 10 години.
„За неколку недели видовме дека тоа ѝ го одзема животот. Мислам дека последната капка беше испраќање и примање пораки на полноќ. Решивме дека не може така да продолжи уште 10 години“, изјави Елачи за Си-Ен-Ен.
Тие ја основаа Heads Up Alliance за да ги охрабрат другите родители да го одложат купувањето мобилни телефони за нивните деца.
Елачи вели дека нема сомнеж дека социјалните мрежи им штетат на австралиските деца.
„Децата кои вршат самоубиство оставаат белешки за самоубиство во кои пишува дека социјалните мрежи играле улога во нивната смрт. И ние сè уште дебатираме дали социјалните мрежи се штетни за менталното здравје на нашите деца“, вели Елачи.
За многу експерти, прашањето не се негативните ефекти на социјалните мрежи, туку дали целосната забрана е вистинскиот одговор.
Во октомври, повеќе од 140 експерти испратија заедничко писмо до австралиската влада велејќи дека забраната е остар одговор што ќе ги спречи технолошките компании да инвестираат во заштитата на децата онлајн.
Комисијата што ги истражува социјалните мрежи во Австралија се согласи со експертите и не повика на забрана во својот конечен извештај.
Наместо тоа, препорача законите да се променат за „дигиталните платформи да се стават под австралиска јурисдикција“ и дека сите промени што ги засегаат младите треба да бидат „договорени со младите“.
„Забраната нема да донесе олеснување што го бараат родителите“
Аманда Трет, раководител на Истражувачкиот центар за млади и издржливи на Универзитетот во Западен Сиднеј, вели дека за многу деца, сегашната возраст од 13 години е сосема соодветна.
„Идејата за забрана е привлечна за родителите затоа што им се чини дека ќе се ослободи од една грижа. Забраната нема да донесе олеснување како што очекуваат родителите. Социјалните мрежи ќе останат клучен дел од родителството во иднина“ објаснува Трет, кој верува дека повиците за забрана се мотивирани од политички и економски прашања.
Во своето соопштение минатата недела, сопственикот на X, Илон Маск, посочи дека предложениот закон е прекумерна владина интервенција.
Самопрогласениот „апсолутист за слободата на говорот“ и близок соработник на новоизбраниот американски претседател Доналд Трамп објави дека забраната „изгледа како скриен начин за контрола на пристапот до интернет за сите Австралијци“.