Пред денешните американски и израелски напади, ЦИА процени дека иранскиот врховен лидер, ајатолахот Али Хамнеи, најверојатно ќе биде заменет со тврдокорни од Корпусот на гардата на Исламската револуција (ИРГЦ) во случај на неговата смрт.
Проценките, направени во последните два месеци, се занимаваа со можните исходи од воената интервенција на САД и нејзиниот потенцијал да поттикне промена на режимот во Исламската Република, што Вашингтон сега отворено го прогласи за своја цел, пишува Ројтерс.
Два извори, кои сакаа да останат анонимни поради чувствителноста на темата, рекоа дека извештаите на разузнавачката агенција не предвидуваат со сигурност никакво конкретно сценарио. ИРГЦ е елитна воена сила која има задача да ја заштити иранската шиитска свештеничка влада.
ЦИА одби да ги коментира наводите.
Повик на Трамп за востание
Американскиот претседател Доналд Трамп со недели најавуваше дека САД се заинтересирани за промена на режимот во Иран, но не појасни детално кој, според Вашингтон, треба да ја води земјата.
Во видео обраќање рано утринава, Трамп ги нарече властите во Техеран „терористички режим“ и го повика иранскиот народ да ја преземе власта, велејќи дека американските воени напади ќе создадат услови за бунт.