Две католички чесни сестри од Калифорнија проневериле половина милион долари за патувања и коцкање во Лас Вегас, објавил нивниот ред.
Сестрите Мери Маргарет Крупер и Лана Чанг, кои се најдобри пријателки, земале пари кои Католичката школа на Свети Јаков во Торанс, јужно од Лос Анџелес, ги добивала од школарина и донации.
– Знаеме дека оделе на патувања, знаеме дека посетувале коцкарници. Користеле и училишна сметка како лична, рекол школскиот адвокат на состанок со родителите и учениците, пренесуваат американските медиуми.
Надбискупијата на Лос Анџелес соопштила дека недостатокот во школските финансии е откриен во рутинска ревизија. Се претпоставува дека двете чесни сестри патувале и трошеле пари последните десет години.
Крупер била управител на училиштето 29 години, пред да замине во пензија. Чанг била учителка 20 години, исто така е во пензија од минатата година.
Нивниот ред, Конгрегацијата на сестри на Свети Јосиф, изразила жалење и најавила дека на училиштето ќе му бидат вратени парите.
Надбискупијата, според зборовите на портпаролот, планира да поднесе кривична пријава против чесните сестри.