Големопродажната цена на гасот се искачи на највисоко ниво во последните 14 месеци откако Украина го спречи натамошниот проток на оваа енергија од Русија во Европа преку гасоводот низ нејзината територија, пишува денеска британски Гардијан.
Референтните цени вчера пораснаа на највисоко ниво од октомври 2023 година, ден по истекот на долгорочниот договор за транзит на природен гас меѓу Русија и Украина, од каде што тој заминува во други земји.
Неговите испораки завршија во првите часови од Новата година.
Трговците, сепак, очекуваа губење на протокот на рускиот гас без алтернатива и внимателно следеа дали тоа ќе доведе до побрзо повлекување од складиштето.
Цената на гасот за февруарската испорака на гас во Холандија денеска поскапе за дури 4,3 отсто, па брзо се врати на цената поскапена за 1,9 отсто во однос на онаа пред прекинот на испораката. Новата цена сега е 49,83 евра за мегават час, објави Блумберг.
Нивото на снабдување во складиштето на гас низ Европа веќе паѓа со најбрзо темпо од 2021 година, кога сè уште се подготвуваше руско-украинскиот конфликт.
Руската инвазија на Украина во февруари 2022 година го предизвика најголемиот конфликт во Европа од Втората светска војна, зголемувајќи ја големопродажната цена на гасот и зголемувајќи ги сметките за енергија.
Ова ја принуди Владата на Велика Британија да интервенира за субвенционирање на трошоците за домаќинствата.
Во објава на социјалните мрежи, украинскиот претседател Володимир Зеленски го опиша крајот на транзитниот договор како „еден од најголемите порази на Москва“.
Рускиот гас тече низ Украина со децении, главно преку советски гасовод кој започнува во Сужи, град во руската област Курск сега контролиран од украинските сили, а завршува во близина на Ужгород, на западната граница на Украина со Словачка.
Украинскиот министер за енергетика Херман Галушченко го опиша прекинот на транзитната рута како „историски“.
Според него, тоа ќе ги принуди земјите низ Европа да се „одвикнат“ од рускиот гас.
Сепак, прекинот на гасот веднаш резултираше со прекин на електричната енергија за стотици илјади луѓе во Придњестровје, отцепен, проруски регион на Молдавија.
Словачкиот премиер Роберт Фицо, кој лобираше против одлуката за намалување на транзитот на гас преку Украина, рече дека тоа ќе има „драстично влијание врз сите нас во Европската унија, но не и врз Руската Федерација“.
Аналитичарите на Дојче банк, сепак, истакнаа дека „вреди да се има предвид дека цените се уште се значително под нивото од цела 2022 година“.
„Меѓутоа, во 2024 година европското складирање на гас беше на најниско ниво во последните три години, така што зголемувањето на цената ќе придонесе за инфлациски притисоци“, велат тие, според Гардијан.