Бунтовничката група М23, која се бори за власт во Конго и е поддржана од Руанда, тврди дека рано утринава го освоила најголемиот град во источниот дел на Конго, Гома.
Групата М23 најави заземање на градот неколку минути пред истекот на рокот од 48 часа што ѝ го даде на конгоанската армија да го предаде оружјето.
Рано наутро во понеделникот, се слушаа пукотници низ градот, велат двајца хуманитарни работници кои се засолниле таму.
Бунтовниците ги повикаа жителите на Гома да останат смирени и припадниците на војската на Конго да се соберат на централниот стадион.
Офанзивата на бунтовниците М23 може драматично да ја влоши војната во Конго, една од најдолгите во Африка.
Според извештајот на Обединетите нации, повеќе од една третина од населението на провинцијата Северен Киву, каде што се наоѓа Гома, е раселено, а заземањето на градот најверојатно ќе ја влоши ситуацијата.
Портпаролот на владата на Конго Патрик Мујаја повика на заштита на цивилите и рече дека земјата е „во воена состојба“.
Конго во саботата вечерта ги прекина дипломатските односи со Руанда, која негираше дека ја поддржува М23 и покрај доказите собрани од експерти на ОН.
Советот за безбедност на ОН го осуди напредувањето на М23 и ги повика бунтовниците да се повлечат.
Додека мировните преговори во втората по големина африканска земја, која со децении беше во војна, повторно пропаднаа, групата М23 зазеде територија долж границата на Конго со Руанда во последните недели.
Во неделата вечерта бунтовниците ги повикаа конгоанските војници да го положат оружјето и да пристигнат на стадионот во Гома до три часот наутро.
Уругвајската војска, која се наоѓа во Гома како дел од мировната мисија на Обединетите нации, во соопштение во неделата соопшти дека некои конгоански војници го положиле оружјето.
Специјалниот претставник на ОН Бинту Кеита пред Советот за безбедност изјави дека и покрај мировната поддршка на ОН за вооружените сили на Конго, силите на М23 и Руанда влегле во населбата Муниги на периферијата на Гома, „предизвикувајќи масовна паника“.
Кеита рече дека борците М23 напредуваат и ги користат жителите „како жив штит“, од кои некои бегаат да си ги спасат животите.
„М23 го прогласи воздушниот простор над Гома затворен“, додаде таа. „Со други зборови, ние сме заробени. “
Министерката за надворешни работи на Конго, Тереза Кајкавамба Вагнер, изјави пред Советот за безбедност дека Руанда води „фронтална агресија, објава на војна која повеќе не се крие зад дипломатските маневри“.
Амбасадорот на Руанда во ОН, Ернест Руамучио, ниту ги потврди ниту ги демантираше тврдењата на Конго.
Тој ја обвини владата на Конго за сегашната ситуација, велејќи дека кризата можеше да се избегне доколку владата „демонстрираше вистинска посветеност на мирот“.
Соединетите Американски Држави и Франција повикаа на прекин на огнот и апелираа до Руанда да ја повлече својата поддршка за М23, а вршителот на должноста амбасадор на САД, Дороти Шеј, предупреди дека САД „ќе ги разгледаат сите средства што им се на располагање“ за да ги повикаат на одговорност оние што водат војна.
Во изминатите 48 часа двајца јужноафрикански војници кои служеа во мировната мисија на ОН се убиени, а 11 се повредени и хоспитализирани, изјави портпаролот на генералниот секретар на ОН Антонио Гутереш пред состанокот на Советот за безбедност.