Поради климатските промени, бројот на жртви од екстремна топлина се зголемил тројно во Европа во јуни оваа година, според резултатите од студијата на Лондонската школа за хигиена и тропска медицина, која опфати 12 големи градови.
Научниците проценуваат дека топлотниот бран е „тивок убиец“ кој одзел 2.300 човечки животи во 12 големи градови помеѓу 23 јуни и 2 јули оваа година, објавува лондонски „Гардијан“.
Милано беше најтешко погодениот град, каде што 317 од 499 смртни случаи се припишуваат на последиците од климатските промени, по што следуваат Париз и Барселона, објавува Танјуг.
„Оваа студија покажува зошто топлотните бранови се познати како тивки убијци. Иако само неколку стотици смртни случаи се пријавени во Шпанија, Франција и Италија, веруваме дека илјадници луѓе починале поради екстремна топлина“, рече Малколм Мистри, епидемиолог на Лондонската школа за хигиена и тропска медицина и коавтор на студијата.
Студијата покажа дека смртноста е поголема кај постарите луѓе – 88 проценти од смртните случаи во групата над 65 години се предизвикани од климатските промени.