Најмалку 25 лица загинаа во пожарите што избувнаа во Лос Анџелес, објави утринава Си-Би-Ес Њуз.
Пожарите уништија повеќе од 12.000 згради и изгореа повеќе од 155 квадратни километри.
Најголемите пожари, Палисадес и Итон, сè уште се надвор од контрола во Јужна Калифорнија, соопштија властите.
Метеоролозите најавија дека на сила е црвено предупредување поради „особено опасна ситуација“ поради засилен ветер кој може значително да ја влоши ситуацијата.
Според нив, денеска се очекуваат најсилни ветрови, а во некои области налетите ќе достигнат и 180 километри на час, кои би можеле да предизвикаат нови пожари, да ги прошират постојните и да урнат дрвја и далноводи.
Надлежните предупредуваат дека ситуацијата може да стане уште посериозна во наредните денови.
Според официјални лица, околу 88.000 луѓе во округот Лос Анџелес моментално се под наредба за евакуација.
Во подрачјата погодени од пожарите Палисадес и Итон, во сила е полициски час, од 18:00 до 18:00 часот.
Иако причината за пожарот во Палисадес се уште не е утврдена, истражителите се фокусираат на популарната патека за пешачење во Лос Анџелес, каде што избувна уште еден пожар, познат како „Пожарот Лахман“.
Пожарот во Палисадес избувна на 7 јануари и брзо се прошири под влијание на силните ветрови во Санта Ана, уништувајќи повеќе од 23.000 хектари и убивајќи најмалку осум луѓе.
По една недела, пожарот сè уште беше 17 отсто локализиран.
Покрај пожарот Палисадес, пожарот Итон, кој започна истиот ден во северна Пасадена, уништи околу 7.000 објекти и се прошири на повеќе од 14.000 хектари, а 35 отсто од него се под контрола, пренесува Танјуг.