Три недели откако избувна пожар на брод покрај брегот на Алјаска, тој потона со илјадници автомобили на него, според американските медиуми.
Товарниот брод „Морнинг Мидас“ потона во Тихиот Океан во понеделник откако гореше три недели, носејќи илјадници автомобили со себе од својот товарен простор.
„Морнинг Мидас“ потона околу 400 милји (667 километри) од брегот откако претрпе штета од пожар и лоши временски услови, соопшти „Зодијак Маритим“, која управуваше со бродот.
Ниту еден дел од товарот не беше спасен пред потонувањето, соопшти компанијата.
Бродот долг 180 метри превезувал 70 електрични возила, 681 хибридни и повеќе од 2.000 конвенционални автомобили, соопшти американската крајбрежна стража.
Бродот, исто така, превезувал повеќе од 1.800 метрички тони морски гориво, што претставува можен ризик од излевање на нафта.
Крајбрежната стража во вторник објави дека досега нема видливи знаци на загадување.
Два влекачи за спасување останаа во близина на местото на потонувањето за да го следат евентуалното загадување и остатоците, а друг брод е на пат за да ја заштити морската средина, соопшти „Зодијак Маритим“.
Сите 22 членови на екипажот на бродот беа евакуирани со чамец за спасување и спасени од комерцијален брод кратко по избувнувањето на пожарот на 3 јуни, додека бродот беше на околу 1.930 километри од Анкориџ.
Бродот беше на пат од Кина кон Мексико.
Чад почна да се крева од палубата каде што се наоѓаа електричните возила, а екипажот повика помош откако не можеа да го локализираат пожарот, соопшти „Зодијак Маритим“.
Противпожарните и спасувачките бродови стигнаа до „Морнинг Мидас“ седум дена откако избувна пожарот.
Во меѓувреме, тој се изгасна, но бродот сепак потона.
Либерија, под чие знаме пловеше бродот, ќе спроведе истрага за причината за пожарот, додека „Зодијак Маритим“ ќе спроведе посебна истрага.
И „Зодијак Маритим“ и крајбрежната стража рекоа дека е прерано да се извлечат заклучоци за тоа дали електричните возила го предизвикале пожарот.
Електричните возила содржат литиум-јонски батерии кои можат да се прегреат и да предизвикаат пожар што брзо се шири и произведува токсични гасови, што го отежнува и го прави гаснењето опасно.
🇨🇳 🇲🇽 BUQUE CON AUTOS ELÉCTRICOS SE HUNDE EN EL PACÍFICO 🚢
Morning Midas, un buque con más de 3,000 vehículos eléctricos procedentes de China con destino a México, se hundió en el Pacífico tras incendiarse por fallas en las baterías.
El incidente ocurrió a 770 km de Alaska. La… pic.twitter.com/qYMMEIkoB2
— México Ahora (@AhoraMex) June 26, 2025