Меѓународната организација за миграција (ИОМ) во понеделник потврди дека 53 мигранти, меѓу кои и две бебиња, загинале или се водат како исчезнати откако чамец со 55 лица се превртел во близина на брегот на Либија.
Несреќата се случила на 6 февруари, северно од Зувара, а само две нигеријки биле спасени за време на операцијата за спасување од страна на либиските власти.
Едната пријавила дека го изгубила сопругот, додека другата изгубила две бебиња во трагедијата.
ИОМ им пружила итна медицинска помош на преживеаните жени, во координација со надлежните органи.
Според преживеаните, бродот што превезувал мигранти и бегалци од африкански националности испловил од Ал-Завија, Либија околу 23:00 часот на 5 февруари, а околу шест часа подоцна се превртел откако водата влегла во внатрешноста.
ИОМ забележува дека само во јануари 2026 година, најмалку 375 мигранти загинале или исчезнале во Централниот Медитеран за време на повеќекратни „невидливи“ бродоломи поради екстремни временски услови, додека се верува дека многу повеќе случаи не се пријавени.
Според Проектот за исчезнати мигранти на ИОМ, повеќе од 1.300 мигранти исчезнале во Централниот Медитеран во 2025 година, а најновата несреќа го зголемува бројот на загинати или исчезнати во 2026 година на најмалку 484.
ИОМ предупредува дека мрежите за шверц и трговија со луѓе продолжуваат да ги експлоатираат мигрантите, заработувајќи пари од опасни премини во неисправни чамци, каде што луѓето се изложени на сериозни злоупотреби и ризици.
Организацијата повикува на посилна меѓународна соработка и мерки насочени кон заштита, како и на создавање безбедни и легални миграциски патишта со цел намалување на ризиците и спасување животи.