Британските специјални сили САС во Авганистан постојано убивале затвореници и невооружени мажи под сомнителни околности, откри истрагата на Би-Би-Си.
Новите воени извештаи сугерираат дека една единица можеби незаконски убила 54 лица во текот на шест месеци.
Би-Би-Си најде докази кои сугерираат дека поранешниот шеф на специјалните сили не обезбедил докази во врска со истрагата за убиствата.
Министерството за одбрана соопшти дека британските војници „служеле храбро и професионално во Авганистан“.
Би-Би-Си дознава дека генералот Сер Марк Карлтон-Смит, поранешен шеф на британските специјални сили, бил информиран за наводните убиства, но не ги предал доказите на кралската воена полиција, дури и откако службата започнала истрага за убиствата од САС.
Генералот Карлтон-Смит, кој стана началник на армијата пред да поднесе оставка минатиот месец, одби да коментира за оваа приказна.
Би-Би-Си Панорама анализирала стотици страници оперативни извештаи на САС, вклучително и извештаи кои опфаќаат повеќе од десетина рации „убиј или зароби“ извршени од единицата САС во Хелманд во 2010/11 година.
Поединци кои служеле во единицата на САС во тој период изјавиле за Би-Би-Си дека биле сведоци на оперативците на САС како убиваат невооружени луѓе за време на ноќните рации.
Тие рекоа и дека виделе оперативци како користат таканаречено „напуштено оружје“ – калашникови (АК-47) поставени на местото на настанот за да го оправдаат убиството на невооружено лице.
Неколку луѓе кои служеа во специјалните сили рекоа дека единиците на САС се натпреварувале меѓу себе за да извршат најмногу убиства и дека единицата чии операции ги видел Би-Би-Си се обидувала да го надмине бројот на убиства од претходната во службата.
Внатрешните мејлови покажуваат дека офицерите на највисоките нивоа на специјалните сили биле свесни дека постои загриженост за можни незаконски убиства, но не пријавиле сомневања до воената полиција и покрај законската обврска да го сторат тоа.
Министерството за одбрана соопшти дека не може да коментира за конкретни наводи, но дека одбивањето да се даде изјава не треба да се сфати како прифаќање на фактичката точност на наводите.
Портпаролот на министерството рече дека британските сили „служеле храбро и професионално“ во Авганистан и дека се однесувале според „највисоките стандарди“.
Шема на сомнително убиство
Во 2019 година, Би-Би-Си и Сандеј Тајмс ја истражуваа рацијата на САС, што доведе до судски спор во Британија и наредба британскиот секретар за одбрана да открие документи кои детално го опишуваат владиното постапување со случајот.
За оваа најнова истрага, Би-Би-Си ги анализираше новодобиените оперативни извештаи во кои се детализирани ноќните рации од одредите на САС.
Најдовме образец на неверојатно слични извештаи за авганистански мажи кои биле убиени поради наводно вадење пушки АК-47 или рачни гранати од зад мебелот откако биле приведени.
На 29 ноември 2010 година, единицата убила маж кој бил приведен и се вратил во зградата, каде што „се обидел да ги нападне со граната“
На 15 јануари 2011 година, единицата убила маж кој бил приведен и се вратил во зградата, каде што „посегнал зад душекот, извадил рачна бомба и се обидел да ја фрли“.
На 7 февруари бил убиен еден притвореник за кој рекоа дека „вперил пушка во патрола“. Истото оправдување беше дадено и за егзекуциите на приведените на 9 и 13 февруари
На 16 февруари двајца затвореници беа убиени откако едниот извадил граната „од зад завесата“, а другиот „станал под масата и извадил АК-47“.
На 1 април, двајца уапсени кои беа вратени во зградата беа убиени откако едниот „посегнал по АК-47“, а другиот „се обидел да фрли граната“
Вкупниот број на загинати за време на шестмесечната операција на одредот беше трицифрен.
Во сите рации што ги прегледа Би-Би-Си, не беа пријавени повредени или повреди на оперативците на САС.