Предлог-законот против штрајк, кој ќе го усвои Велика Британија оваа година особено е наменет за пожарникарите кои заедно со поштарите, медицинските лица, пристанишните работници, железничарите и адвокатите штрајкуваа минатата година.
Тие бараат зголемување на платите, а како одговор Владата одлучи со закон да ги заостри условите за штрајк, поради што синдикатот на противпожарните бригади повикува на „масовно движење на отпорот“.
Од синдикатот велат дека законот е „срамен напад“ врз демократските права и слободи на работните луѓе, поради што повикуваат на масовен бојкот.
Сметаат дека новиот правен акт е сериозен напад врз сите работници, особено врз клучната сила која ги одржува јавните услуги и кои особено се жртвуваа за време на пандемијата на корона вирусот.
„Тоа е напад врз хероите во борбата против пандемијата. Удар за сите работници, затоа е потребно обединување и отпор на авторитарните потези“, ја пренесува „Гардијан“ во пораката на синдикатот.
На крајот на декември, премиерот Риши Синак рече дека се надева оти синдикатите ќе увидат дека е погрешно да се нарушува секојдневниот живот на многу луѓе со штрајкови, особено за Божиќ, но тој е подготвен, вели, да воведе нови закони со цел да се заштитат животите на граѓаните и да се намалат „пречките во нивниот живот“.