Британскиот крал Чарлс изјави дека британско-француското партнерство треба да биде уште поблиско во услови на „сериозни предизвици“, а ова го кажа за време на гала вечерата што ја приреди синоќа во замокот Виндзор во чест на францускиот претседател Емануел Макрон.
Кралот Чарлс и францускиот претседател вечераа со кралското семејство и околу 160 гости, меѓу кои и Сер Мик Џегер и Сер Елтон Џон, јавува Би-Би-Си.
На почетокот од државната посета, Макрон и неговата сопруга Брижит вчера беа почестени со церемонијална поворка со кочии низ Виндзор, во придружба на британскиот суверен, кралицата, принцот и принцезата од Велс.
Од изборот на премиерот Кир Стармер минатата година, Велика Британија се стреми да ги ресетира односите со своите европски сојузници, објави претходно Ројтерс.
Фокусот на разговорот со Макрон ќе бидат прашања поврзани со миграцијата, безбедноста и економската соработка.
Стармер денес ќе биде домаќин на Макрон на Даунинг стрит, а се очекува британската страна да предложи пилот-договор за враќање на барателите на азил, јавува Танјуг.