Високиот претставник на Европската унија (ЕУ) за надворешна политика и безбедност, Жозеп Борел, чие патување во Кина беше двапати одложено, денеска изрази надеж дека ќе ја посети таа земја „по летото“.
Првата посета, планирана за средината на април, беше одложена бидејќи Борел беше заразен со коронавирусот, а втората, закажана за јули, кинеските власти ја откажаа во последен момент.
„Се надевам дека мојата посета на Кина, која двапати беше откажана, ќе се случи наскоро по летото“, рече Борел на почетокот на состанокот на министрите за надворешни работи на ЕУ во Брисел.
На состанокот ќе се разговара за стратегијата претставена од Европската комисија во јуни, ризиците за економската безбедност на ЕУ, со фокус на Кина.
ЕУ сака да има своја економска ориентација во однос на Пекинг, без да се усогласи со Вашингтон.
„Економската безбедност не е само технолошко прашање. Ќе испитаме кои технологии можат да не доведат до ситуација на зависност, бидејќи тоа може да влијае на нашата надворешна политика“, подвлече Борељ.