Шефот на европската дипломатија, Жозеп Борел, денеска го обвини рускиот претседател Владимир Путин дека „се подготвува за долга војна“ и предупреди на можноста конфликтот на Блискиот Исток да се прошири и во Либан, откако либанскиот Хезболах, кој го поддржува Иран, се закани дека ќе го нападне Кипар.
Кога станува збор за Украина, Борел, по пристигнувањето на состанокот на министрите за надворешни работи на ЕУ во Луксембург, рече дека ќе претстави предлог како да се избегне која било земја-членка да го блокира користењето на приходите од замрзнатите руски финансиски ресурси за поддршка на Украина.
Тој додаде дека поддршката на ЕУ за Украина мора да се зголеми.
„Имаме приходи од замрзнати средства и мораме да бараме начин да ги искористиме, избегнувајќи каква било блокада“, изјави Борељ за новинарите.
Тој додаде дека првата транша пари ќе пристигне следната недела, а втората неколку месеци подоцна.
„Не можете да ги складирате овие пари. Мора да се искористат. Имаме законска процедура за да избегнеме каква било блокада“, рече Борељ.
Тој оцени дека е очигледно оти рускиот претседател Владимир Путин „се подготвува за долга војна“ бидејќи, како што наведе, по самитот во Швајцарија, Путин „патува во Северна Кореја, патува секаде каде што може да набави оружје“.
Тој додаде дека на денешната средба на дипломатите на ЕУ ќе се разговара за ситуацијата на Блискиот Исток и појасот Газа и посочи дека тој и комесарот Јанез Ленарчиќ укажале дека испораката на хуманитарна помош за Газа станала невозможна.
„Ризикот оваа војна да го зафати југот на Либан и да се прелее се зголемува секој ден. Ние сме многу загрижени“, предупреди Борељ.
Шефот на европската дипломатија нагласи дека на состанокот на Советот на ЕУ за надворешни работи во Луксембург ќе се разговара и за ситуацијата во Грузија.
„Отворена е вратата за Грузија да стане членка на Европската унија, но ако владата продолжи по истиот пат, продолжи да го прави тоа што го прави, оваа врата ќе биде затворена. рече Борел.