Американскиот државен секретар Eнтони Блинкен оствари телефонски разговор со министерот за надворешни работи на Саудиска Арабија, принцот Фајсал бин Фархан, во кој ги осуди нападите на јеменското движење Хути врз трговски бродови во меѓународните води во Црвеното Море, соопшти Стејт департментот.
Хутите поддржани од Иран влегоа во војната меѓу Израел и палестинската група Хамас напаѓајќи бродови во виталните водни патишта, па дури и пукајќи дронови и проектили кон Израел, на повеќе од 1.000 километри од нивното седиште во главниот град на Јемен, Сана.
Групата Хути во понеделникот соопшти дека извршила напад со беспилотни летала врз два товарни брода во еден од нејзините последни напади во регионот.
Неколку земји се согласија да спроведуваат заеднички патроли во јужниот дел на Црвеното Море и Аденскиот Залив за да се обидат да го заштитат комерцијалниот брод од нападите на бунтовниците Хути, кои тврдат дека ги поддржуваат Палестинците под израелска опсада во Појасот Газа.
– Секретарот исто така го осуди продолжувањето на нападите на Хутите врз комерцијалните бродови кои пловат во меѓународните води во јужниот дел на Црвеното Море и повика на соработка меѓу сите партнери за поддршка на поморската безбедност – се вели во соопштението на Стејт департментот по телефонскиот разговор меѓу двајцата дипломати.
Во телефонскиот разговор Блинкен зборувал за „спречување на понатамошна ескалација на конфликтот“, соопшти Стејт департментот.
Министерот за надворешни работи на Саудиска Арабија овој месец рече дека борбите во Газа мора веднаш да се прекинат и дека владите ширум светот не го гледаат тоа како приоритет.
Иако Обединетите нации повикаа на итен хуманитарен прекин на огнот во Појасот Газа, САД и Израел се спротивставија на тие повици, велејќи дека тоа ќе му помогне на Хамас повторно да се вооружи и да се прегрупира.
Нападот на Хамас на 7 октомври врз Израел остави 1.200 мртви, а последователниот израелски напад врз Газа загинаа речиси 20.000, соопшти локалното Министерство за здравство, а многу други се водат за исчезнати и се верува дека се затрупани под урнатините, пренесува Ројтерс.