САД привремено суспендираат одредени програми за странска помош што ги користи владата на Нигер, но ќе продолжат да обезбедуваат хуманитарна и прехранбена помош, изјави американскиот државен секретар Ентони Блинкен.
Блинкен во петокот рече дека американската помош за владата на Нигер зависи од демократското владеење и почитувањето на Уставот.
„Остануваме посветени на поддршката на народот на Нигер за да им помогнеме да ја зачуваат тешко стекнатата демократија и го повторуваме нашиот повик за итно обновување на демократски избраната влада на Нигер“, рече Блинкен, пренесе Ројтерс.
Нигер е клучен партнер на Вашингтон во борбата против исламистичките бунтовници кои убија илјадници луѓе и раселеа милиони.
Американскиот воен персонал ги обучуваше локалните сили за борба против милитантните групи.
Меѓутоа, воената хунта го собори демократски избраниот претседател на Нигер, Мохамед Базум и неговата влада на 26 јули, поради што министрите за одбрана на Западна Африка подготвија план за воена акција доколку до утре во Нигер не се врати демократската влада. пренесува Танјуг.