Слабо исчистените тротоари во градот и почетокот на школската година за 10 до 15 проценти го зголемија бројот на пацинети на хирушкото одделение во кумановската болница кои бараат помош поради набиеници и скршеници на екстремитетите .
Началникот на Одделението за хирургија, доктор Методија Димковски апелира граѓаните да внимаваат како се движат со оглед на заледените површини кои се најчеста причина за пад и здобивање повреди.
По наши податоци од почетокот на школската година вчера имаме така еден зголемен прилив на повредени, ако минатата недела просечно 30-40 повреди збринувавме во нашата хирушка амбуланта од кои десетина беа скршеници сега имаме 43 точно за вчера од кои пак 11 се скршеници, девет се збринети кај нас, а две се пратени во Скопје, значи малку незначително 10-15% имавме повеќе повреди вчера. Ако споредиме со викендот кој беше релативно мирен, вчера прв школски ден интензивно десетина посто повеќе повреди – рече Димковски.
Најчести пациенти се децата и старите лица, а утринава до 11 часот се јавиле тројца пациенти во кумановската болница кои се здобиле со повреди. Посериозните скршеници како итни случаи се препраќаат во Скопје, а останатите се третираат од страна на кумановските лекари.
Доктор Димковски упати апел граѓаните доколку се здобијат со повреди да не се лечат во домашни услови, туку навремено да се јават на лекар за да соодветно бидат згрижени.
Екипите на Јавното претпријатие „Чистота и зеленило“ од утринава активно се на терен и ги чистат тротоарите во централното градско подрачје, а по долго време започнаа да го кршат и ледот од градскиот плоштад.
Сепак се апелира граѓаните да исчистат пред своите домови, а сопствениците на дуќани да не забораваат на обврската сами да ги исчистат тротоарите пред објектите, во спротивно за тоа следува парична казна од 50 евра.