Борбите се водат во рускиот пограничен регион Курск од август годинава, по ненадеен упад на украинските единици, додека руските сили се обидуваат да ги протераат.
Украинскиот претседател Володимир Зеленски тврди дека Москва собрала таму 50.000 војници.
Во редовното обраќање Зеленски рече дека операцијата на украинските единици во регионот Курск „ја ограничува Русија во нејзините напади внатре во Украина“.
Зеленски постојано го опиша изненадувачкиот упад на украинските сили во Курск како стратешки потег за забавување на руската офанзива во Украина, иако некои западни сојузници се сомнителни.
Според американскиот Институт за проучување на војната, Русија имала 11.000 војници во Курск кога Украина го започна својот ненадеен упад на почетокот на август.
Сепак, извештајот на Њујорк тајмс сугерира дека Москва успеала да собере војници во Курск без да мора да ги повлече војниците од Украина.
„Нашиот народ чува 50.000 припадници на окупаторската армија кои поради операцијата Курск не можат да бидат распоредени на другите руски офанзивни линии на наша територија“, изјави украинскиот претседател.
Зеленски додаде дека за ситуацијата на тој фронт бил информиран од врховниот командант на украинската армија, генерал Александар Сирски, кој претходно во понеделникот изјави дека извршил увид во украинските единици распоредени во Курск.
Ако украинските сили не навлегле во Курск, „десетици илјади непријатели од најдобрите руски единици ќе ги нападнеле“ украинските позиции во регионот на Доњецк, вели Сирски.
Доњецк е клучно бојно поле од избувнувањето на конфликтот пред една деценија.
Во тој регион во источна Украина продолжуваат жестоките борби, а двете страни во понеделникот меѓусебно се обвинија дека ја оштетиле браната во близина на градот Курахово, кој е под контрола на Украина.
Со месеци, руските трупи полека напредуваат во регионот кон клучниот град Покровск – главниот центар за снабдување на украинските сили.
Повикувајќи се на неименувани американски и украински претставници, Њујорк Тајмс проценува дека околу 50.000 руски и севернокорејски војници се стационирани во регионот Курск, подготвени да ги контранападат украинските сили.
„Новата американска проценка заклучува дека Русија собира сили без да мора да ги повлече војниците од источна Украина, нејзината главна воена цел, дозволувајќи и да врши притисок на повеќе фронтови истовремено“, пишува весникот.
Целта на операцијата, која би можела да започне во наредните денови, ќе биде да се врати контролата врз целиот регион Курск, додава Њујорк Тајмс.
И Украина и САД велат дека повеќе од 10.000 севернокорејски војници се испратени во Русија.
Москва ниту потврдува ниту негира дека војниците од Северна Кореја, близок сојузник од советската ера, се во Курск.
За време на посетата на рускиот претседател на Пјонгјанг во јуни оваа година, севернокорејскиот лидер Ким Џонг Ун и Владимир Путин постигнаа договор за взаемна помош во случај на агресија врз една од двете земји.
Двајцата претседатели потоа го ратификуваа договорот.
Откако Русија ја започна својата инвазија на Украина во февруари 2022 година, Северна Кореја и Русија, кои се под санкции од Западот, се зближија.
САД постојано го обвинуваат Пјонгјанг дека испраќа огромни количества воена опрема во Русија, вклучувајќи балистички ракети и фрлачи.
Генералниот секретар на НАТО Марк Руте неодамна сугерираше дека Пјонгјанг добива воена технологија и друга поддршка од Москва за да помогне во избегнувањето на меѓународните санкции.
Во меѓувреме, Кремљ ги демантираше медиумските извештаи дека победникот на претседателските избори во САД, Доналд Трамп, имал телефонски разговор со Путин.
Во неделата „Вашингтон пост“ објави информација за телефонскиот разговор меѓу Трамп и Путин, кој наводно се случил во четвртокот.
Истиот весник наведува дека Трамп наводно го предупредил рускиот претседател да не ја ескалира војната во Украина и го споменал големото воено присуство на Америка во Европа.
Портпаролот на Кремљ рече дека таквите извештаи се „чиста фикција“, додека тимот на Трамп изјави за Би-Би-Си дека нема да ги коментира „приватните повици“ на новоизбраниот претседател.