Без проблеми мина првиот ден од екстерното тестирање за за 1410 ученици во завршните години од средното образование во Куманово. Само двајца ученици не биле екстерно проверени поради нивно отстуство.
Сите тестирања започнале навремено точно во 09:30 часот. Во Средното општинско училиште „Перо Наков“ биле тестирани вкупно 280 ученици.
Денеска во СОУ „Перо Наков“ се изведува екстерното тестирање, засега се поминува во најдобар ред од техничка страна и во однос на кадровската екипираност со тестатори, резервни тестатори. Се тестираа вкупно 126 ученици на македонски наставен јазик и 154 на албански наставен јазик во термини кои што се предвидени односно дадени од ДИЦ – изјави Лидија Тасевска, директор на СОУ „Перо Наков“.
Без проблеми во три термини се одвиваше екстерната проверка на матурантите во техничкото училиште „Наце Буѓони“, каде беа тестирани 203 ученици на македонски и 276 ученици на албански наставен јазик.
Loading...
Од вкупно 122 ученици во СОУ „Киро Бурназ“ биле тестирани сите, освен еден кој бил отсутен. И таму екстерната проверка се одвиваше во два термини од 09:30 и 11 часот.
Во најдобар ред мина и тестирањето во двете кумановски гимназии. Во гимназијата „Гоце Делчев“ освен еден ученик кој бил отсуден, биле тестирани вкупно 282 ученици, додека во гимназијата „Сами Фрашери“ на екстерната проверка денес се појавиле сите 258 матуранти.
Во четврток ќе се одржи вториот круг од екстерната проверка на знаењата на средношколците, а прелиминарните резултати како што информира од Државниот испитен центар ќе бидат објавени на 7ми февруари по што учениците ќе имаат рок да поднесат претставки.