Во текот на викендот, Белгија врати во Египет саркофаг за кој се проценува дека е стар околу 2.000 години, десет години откако полицијата го конфискуваше во Брисел.
Саркофагот му бил предаден на египетскиот амбасадор на церемонија одржана во белгиската престолнина, објавија белгиските власти во понеделник.
„Враќањето на нелегално украден предмет во земјата на потекло е праведен чин по десет години истрага и судска постапка“, изјави државниот обвинител на Брисел, Жулиен Моинил, во таа пригода, според француската новинска агенција АФП.
Белгиската полиција го заплени саркофагот во 2015 година врз основа на соопштение од Интерпол по барање од египетски суд.
Во меѓувреме, артефактот бил складиран во Кралскиот музеј на уметност и историја во Брисел.
Според белгиските експерти, дрвениот саркофаг датира од периодот на Птоломејското кралство, помеѓу 4-тиот и 3-тиот век п.н.е., и „несомнено му припаѓал на член на египетската висока општествена класа“.
Тие истакнаа дека изборот на материјали и исклучително прецизната изработка сведочат за високото ниво на занаетчиство во тоа време.
Врз основа на хиероглифите на саркофагот, утврдено е дека во него бил погребан човек по име Па-ди-Хор-па-херед, кој бил прикажан на саркофагот како се трансформира во древниот египетски бог на подземјето Озирис.