Белгија соопшти дека ќе ја признае државата Палестина на Генералното собрание на Обединетите нации овој месец, придружувајќи им се на Франција и другите западни земји во потег што ги налути Израел и САД.
„Соочена со насилството извршено од Израел, кршејќи го меѓународното право, со оглед на своите меѓународни обврски, вклучително и должноста да спречи секаков ризик од геноцид, Белгија мораше да донесе силни одлуки за да го зголеми притисокот врз израелската влада и терористите на Хамас“, напиша белгискиот министер за надворешни работи Максим Прево во вторник на IX, објавувајќи ја намерата на Белгија да ја признае Палестина.
Франција и Саудиска Арабија водеа дипломатски напори за да ги охрабрат земјите да признаат палестинска држава на самитот за време на Генералното собрание на ОН од 9 до 23 септември во Њујорк.
Франција, заедно со Велика Британија, Австралија и Канада, веќе даде ветување, во потег опишан како политички сигнал кој има за цел и да го осуди проширувањето на израелските населби и военото присуство на териториите, пренесува „Rfi“.