Американскиот претседател во заминување Џозеф Бајден изјави во вторникот дека Палестинците во Газа заслужуваат сличен договор за ставање крај на конфликтот каков што беше постигнат за да се стави крај на војната во Либан.
„Луѓето во Газа поминаа низ пекол, нивниот свет е целосно уништен, премногу цивили во Газа претрпеа премногу. Сега, Хамас мора да направи избор. Нивниот единствен излез е да ги ослободи заложниците, вклучително и американските граѓани. рече Бајден во обраќањето од Белата куќа, објави „Тајмс оф Израел“.
Тој додаде дека договорот што го промовираат САД ќе овозможи голема испорака на хуманитарна помош во Газа и ќе резултира со „крај на војната, без Хамас на власт“.
Бајден рече дека САД, Египет, Катар и сега Турција ќе извршат нов притисок за прекин на огнот во Газа.
Ова е првпат Турција да се споменува како учесник во разговорите, откако Катар претходно објави дека привремено ги прекинува напорите за посредување.
Бајден, исто така, рече дека прекинот на огнот во Либан, за кој беше постигнат договор да започне во 04:00 часот утринава, ја приближува неговата администрација до визијата за поинтегриран Блиски Исток – онаа која вклучува формирање на демилитаризирана палестинска држава заедно со Израел.
За таа цел, Бајден рече дека САД се уште се подготвени да посредуваат во постигнувањето договор за нормализација на односите меѓу Израел и Саудиска Арабија, кој ќе вклучува „веродостоен пат до формирање на палестинска држава“.
Израел во минатото постојано ја отфрла рамката на две држави.
„Верувам дека овој план е сè уште можен. За време на мојот преостанат период на функцијата, неуморно ќе работам на унапредување на оваа визија“, рече Бајден.
Тој призна дека договорот за нормализација на Саудиска Арабија ќе бара од Израел да направи „тешки избори“.
„Сега, Израел мора да биде храбар во претворањето на тактичките придобивки против Иран и неговите полномошници во кохерентна стратегија која обезбедува долгорочна безбедност на Израел и унапредување на поширок мир и просперитет во регионот“, рече Бајден.
Тој додаде дека ја „поздравува храбрата одлука на лидерите на Либан и Израел да стават крај на насилството“.
„Тоа не потсетува дека мирот е можен. Се додека е така, никогаш нема да престанам да работам на тоа“, заклучи Бајден.