Американскиот претседател Џозеф Бајден вчера ги повика земјите од Г-20, група од најбогатите економии во светот, да го поддржат суверенитетот на Украина.
„САД силно го поддржуваат суверенитетот и територијалниот интегритет на Украина. Според мене, тоа треба да го направат сите на оваа маса“, рече Бајден на првата пленарна седница на самитот на Групата 20 во Рио де Жанеиро, пренесува АФП.
Бајден, исто така, ги повика земјите од Г-20 да го „зголемат притисокот врз Хамас“ за постигнување прекин на огнот во Појасот Газа во војната со Израел и увери дека „ќе продолжи да работи на постигнување договор“ пред да ја напушти функцијата.
„Ги повикувам сите овде да го зголемат притисокот врз Хамас, кој го отфрла договорот“, рече Бајден на самитот на Г20, пренесува Бета.
Бразилскиот претседател Луис Инасио Лула да Силва претходно им посака добредојде на странските лидери на самитот на Групата 20 (Г20) во Музејот на модерна уметност во Рио де Жанеиро и одржа воведно обраќање фокусирајќи се на гладот.
„На нас овде на оваа маса зависи да се соочиме со итната задача да ставиме крај на оваа маана на човештвото. Тоа ќе биде нашето најголемо наследство“, им рекол Лула на своите колеги, пренесе АП.
Зголемените глобални тензии и неизвесноста во врска со идната администрација на новоизбраниот американски претседател Доналд Трамп негативно влијаеа на очекувањата дека Бразил ќе усвои силно формулирана изјава за конфликтите на Блискиот Исток и меѓу Русија и Украина, наведува агенцијата.
Наместо тоа, експертите предвидуваат дека конечниот документ ќе се фокусира на социјалните прашања како што е искоренувањето на гладот, еден од приоритетите на Бразил, и ќе вклучи барем спомнување на тековните војни, пренесува Танјуг.
Претседателот Бајден претходно стана првиот актуелен американски претседател кој ја посети амазонската прашума за да ги нагласи опасностите од глобалното затоплување.
Кинескиот претседател Си Џинпинг изрази желба за подобрување на односите на Кина со Бразил, каде што пристигна во државна посета и на самит на лидерите на Г-20.
Во неделата, Бајден отпатува за Манаус, најголемиот град во Амазон, каде што се состана со локалните лидери кои работат на зачувување на прашумите, пред да продолжи во Рио де Жанеиро на самитот на Г20.