Австрија објави дека ја прекинува помошта за Палестинците, во вкупен износ од околу 19 милиони евра за неколку проекти, како одговор на нападот на Хамас врз Израел.
Оваа одлука утрово ја соопшти австрискиот министер за надворешни работи Александар Шаленберг, пренесува Sky News.
Инаку, владејачките конзервативци во Австрија зазедоа една од најпроизраелските позиции во Европската унија во последните години.
Израелското знаме беше подигнато над канцеларијата на канцеларот и Министерството за надворешни работи по шокантниот напад на Хамас започнат од Појасот Газа во саботата.
Германија исто така разговара за запирање на помошта
„Размерите на теророт се толку страшни што не можеме да се вратиме на вообичаеното работење. Затоа, засега ќе ги замрзнеме сите плаќања од австриската развојна соработка“, изјави Шаленберг за радио ORF, додавајќи проценка на средствата и проектите на кои ова се применува.
Тој не направи разлика помеѓу Газа, палестинска енклава со која управува Хамас, и многу поголемиот Западен Брег, кој е управуван од Палестинската управа поддржана од Западот и предводена од претседателот Махмуд Абас, чие движење Фатах му се спротивставува на Хамас.
Одлуката доаѓа откако соседна Германија вчера расправаше дали да ја замрзне помошта за Палестинците по нападот на Хамас.
Германската министерка за развој Свења Шулце од владејачките социјалдемократи рече дека владата секогаш внимавала парите да се користат само за мирољубиви цели.