Претставничкиот дом на американскиот Конгрес синоќа гласаше за нацрт-закон со кој се воведуваат санкции против членовите на Меѓународниот кривичен суд (МКС), чиј обвинител побара издавање налог за апсење на израелскиот премиер Бенјамин Нетанјаху.
Предлогот има мали шанси да помине во горниот дом на Сенатот, каде демократите се мнозинство, а претседателот Џо Бајден изрази противење.
Но, за републиканското мнозинство во Претставничкиот дом, кој го предложи текстот, вчерашното гласање покажува дека „САД цврсто стојат со Израел“.
– Тие одбиваат да дозволат меѓународните бирократи да издаваат, без никаква причина, налози за апсење на израелските лидери за непостоечки злосторства, рече пратеникот Мајк Џонсон.
На 20 мај, обвинителот на МКС, Карим Кан, побара апсење на израелскиот премиер Бенјамин Нетанјаху, како и на лидерот на палестинскиот Хамас за воени злосторства и злосторства против човештвото извршени во Појасот Газа и во Израел.
Доколку „одборот на судии“ одобри, тогаш 124-те земји-членки на МКС можат да продолжат со апсењата. Меѓутоа, ниту САД ниту Израел не се членки на Меѓународниот кривичен суд.
Американскиот претседател Џо Бајден, кога обвинителот Кан ја објави наредбата, рече дека е „скандалозна“, но Белата куќа ја критикуваше републиканската иницијатива минатата недела, велејќи дека казнувањето на Меѓународниот кривичен суд не е „добар пристап“.
Текстот што беше изгласан вчера кога за него гласаа републиканските членови и околу една петтина од демократите во Долниот дом, ќе им забрани на претставниците на МКС вклучени во тој случај да влезат на американска територија.