Американскиот републикански конгресмен Пит Сешнс изјави дека околу 2.500 американски маринци би можеле да го обезбедат иранскиот остров Харг, клучен за извоз на нафта, но инсистираше дека тоа не претставува класична копнена инвазија.
Сешнс го кажа ова во интервју за Си-Ен-Ен.
„Разговарав со некои медиуми синоќа и реков дека верувам дека тие 2.500 маринци од експедициската сила веројатно ќе бидат распоредени за да го обезбедат островот“, рече Сешнс.
Пентагон неодамна го испрати десантниот брод УСС Триполи, амфибиски брод што превезува околу 2.500 маринци, хеликоптери и борбени авиони, на Блискиот Исток.
Тој додаде дека не го гледа овој вид операција како класична борбена операција на копно. „Островот, според мене, не е ситуација со копнени сили во борбени услови“, рече тој.
Новинарот на Си-Ен-Ен потоа го потсети дека ова е територија на Иран. „Нема да го оспорувам тоа, всушност сте во право“, одговори Сешнс.
Зошто САД сакаат да го обезбедат островот?
Сешнс посочи дека целта на американската операција е да се обезбеди клучна нафтена инфраструктура, која САД досега не ја нападнале.
„Претседателот одлучи да не ја уништи можноста за извоз на нафта и мислам дека сака да го обезбеди тој простор за да ги спречи Иранците да си наштетат“, рече тој.
Тој додаде дека го смета таквиот потег за разумен. „Мислам дека тоа е веројатно мудро“, рече тој.
Не е инвазија, тврди Сешнс
Сешнс нагласи дека распоредувањето на маринци нема да биде исто како влегувањето на американските сили длабоко во Иран, во урбаните средини.
„Дали е тоа копнена операција? Не, не на начин како во Иран, во градовите, каде што во минатото имавме ситуации со голем број цивили и борци против нас, што се претвори во хаос“, рече тој.
Тој додаде дека се спротивставува на испраќањето американски сили во густо населени области.
„Јас сум против она што го нарекувам хаос – испраќање луѓе, маринци и снајперисти во урбаните средини“, рече Сешнс.
Островот Харг е клучен за иранската нафта
Островот Харг е од големо стратешко значење бидејќи околу 90 проценти од извозот на нафта на Иран минува низ него.
САД неодамна нападнаа голем број воени цели во областа, но не ја таргетираа нафтената инфраструктура.
Изјавите на Сешнс сугерираат дека следниот чекор би можел да биде физичко обезбедување на островот од страна на американските сили, што би претставувало понатамошна ескалација на конфликтот, иако тој тврди дека тоа не би била класична инвазија.