Американската министерка за финансии Џенет Јелен ги повика денеска земјите од Г-20 да преземат итни мерки за да ја ограничат краткорочната криза со несигурноста на храната поттикната од руската војна во Украина и да избегнат ограничувања на извозот и складирање залихи, фактори кои влијаат на нарушувањата на пазарот.
Јелен учествува на дводневниот состанок на министрите за финансии на Г20 и гувернерите на централните банки на индонезискиот остров Бали.
Обраќајќи им се на учесниците, таа рече дека земјите треба да се фокусираат на мерки за фискална поддршка за оние на кои им е најпотребна наместо да усвојуваат скапи и регресивни потпори.
„Поттикнување на трошење“
Таа, исто така, ги повика членките на Г20 да ја зголемат потрошувачката како одговор на предизвиците за безбедноста на храната кои произлегуваат од конфликтот во Украина, климатските промени и економските шокови од пандемијата на Ковид-19.
Тие предизвици дополнително се влошија, истакна Јелен, со зголемувањето на цените на храната, вештачките ѓубрива и енергетските производи.
Таа повтори дека рускиот претседател Владимир Путин „ја користи храната како оружје за војна“, наведувајќи ги „уништувањето на земјоделската инфраструктура“, кражбата на жито и земјоделската опрема и блокадата на пристаништата на Црното Море.
Најдиректно погодени се посиромашните домаќинства во најсиромашните земји, посочи таа.
„Мораме да преземеме акција“
„Мораме да преземеме акција за да се справиме со краткорочната криза со несигурноста на храната. Брзината и мудроста на нашите одлуки ќе бидат клучни за ставање под контрола на сегашната криза“, рече Јелен.
Конкретно, таа ги повика мултилатералните банки за развој, агенциите за храна со седиште во Рим и Глобалната програма за земјоделство и безбедност на храната (ГАФСП) итно да реагираат.
Не ни требаат, рече Јелен, „нови институции, туку силна координација, споделување знаење, истражување и развој, финансирање и акција“.
Таа, сепак, го поздрави формирањето на Глобалната алијанса за безбедност на храната.
Во јуни Вашингтон објави дека ќе одвои дополнителни 2,76 милијарди долари поврзани со несигурноста на храната, покрај 2,8 милијарди што веќе ги издвои за руската инвазија на Украина.
Исто така, финансиски се приклучува на иницијативите во рамките на Европската банка за обнова и развој и Африканската банка за развој.