Израелската офанзива во Појасот Газа продолжува – во последните 24 часа, десетици луѓе се убиени, повеќе од 62.000 Палестинци загинаа од почетокот на војната, соопшти Министерството за здравство на Газа.
Во исто време, во Њујорк се одржа седница на Советот за безбедност на Обединетите нации, без присуство на израелски претставници.
САД повторно ги критикуваа одлуките на неколку земји да ја признаат државата Палестина, предупредувајќи дека таков потег ги поткопува мировните напори.
Меѓународната заедница, од друга страна, повика на итен прекин на војната и решение за растечката хуманитарна катастрофа.
Продлабочувањето на израелско-палестинскиот конфликт беше главна тема на седницата на Советот за безбедност на Обединетите нации, одржана во Њујорк без присуство на израелски претставници.
САД повторно ги критикуваа земјите што ја признаа палестинската држава, додека неколку членки на ОН предупредија на хуманитарна катастрофа во Појасот Газа и на ризикот од поширока регионална нестабилност.
„Се соочуваме со едно од најмрачните поглавја во израелско-палестинскиот конфликт. Поминаа речиси две години од нападот на Хамас на 7 октомври и разорниот одговор на Израел. Насилството само се продлабочи, загрозувајќи ја регионалната и глобалната безбедност“, рече Антонио Гутереш, генералниот секретар на ОН.
САД: Признавањето на Палестина ги поткопува мировните напори
Амбасадорот на САД во ОН, Мајк Валц, рече дека признавањето на Палестина го охрабрува Хамас и ги поткопува мировните напори.
„За жал, конференцијата организирана од Франција и Саудиска Арабија во врска со признавањето на државата Палестина само ќе ја продолжи војната во Газа и страдањето на палестинскиот народ. Хамас е дополнително зајакнат од тоа. Ние ги наградуваме нивните опструкции и ги поткопуваме напорите за постигнување мир, без разлика дали на краток или на долг рок. Едностраното признавање на државата Палестина нема да ја промени реалноста на теренот, ниту фактот дека во моментов нема држава што може да се признае, ниту кредибилен палестински партнер за мир“, рече Валц.
Калас: Воено решение во Газа не е можно, војната сè уште трае
Спротивно на американскиот став, високата претставничка на ЕУ за надворешни работи и безбедносна политика, Каја Калас, изјави дека војната нема воено решение.
„Доколку воено решение беше можно во Појасот Газа, војната на Израел против Хамас веќе ќе завршеше, а заложниците ќе беа ослободени. Наместо тоа, војната продолжува, имаше глад што можеше да се избегне доколку беше доставена помош“, истакна Каласова.
Трамп: Време е војната да престане
На маргините на сесијата на Генералното собрание на ОН, претседателите на Америка и Франција, Доналд Трамп и Емануел Макрон, разговараа за ситуацијата во Газа.
Францускиот претседател нагласува дека одлуката на Франција и 11 други земји да ја признаат државата Палестина не значи игнорирање на нападот на Хамас од октомври 2023 година.
„Само вчера, 11 земји ја признаа палестинската држава, тоа е голема промена. Претседателот Трамп е во право, никој не заборава што се случи на 7 октомври, сите заедно бевме сведоци на тој ужасен напад, но по две години војна, каков е резултатот? Израелците ги убија лидерите на Хамас, но во исто време има ист број борци на Хамас како и на првиот ден, тие не успеаја да го распуштат Хамас“, рече Макрон.
Американскиот претседател Доналд Трамп изрази увереност дека ќе се најде решение за војната во Газа, додавајќи дека се надева дека ова решение ќе биде прифатливо за сите страни.
Тој рече дека е време конфликтот да престане и заложниците да се вратат во своите домови.
„Ќе имаме решение за војната во Газа, се надевам дека ќе биде добро за сите, време е оваа војна да престане. Сакам да се реши, заложниците да се вратат дома“, рече Трамп.