Амбасадата на САД во Ирак денес ги предупреди своите граѓани дека се изложени на ризик од киднапирање поради тековните тензии во регионот на Блискиот Исток и ги повика да „не се истакнуваат“.
„Иран и терористичките милиции поврзани со Иран продолжуваат да претставуваат значителна закана за јавната безбедност. Имало напади врз американски граѓани и американски интереси во Ирак, а Американците се соочуваат со ризик од киднапирање. Американски бизниси, хотели што ги посетуваат странци и други објекти во Ирак, вклучително и оние со врски со САД, биле нападнати. Критични инфраструктурни локации низ целиот Ирак исто така биле цел“, се вели во соопштението, како што објави Ал Арабија.
Амбасадата соопшти дека ги повикува американските граѓани да останат будни, да не се истакнуваат и да се држат подалеку од областите што би можеле да ги направат цел.
„Собирањето во области поврзани со САД или со групи други американски граѓани може да ве доведе во опасност“, се додава во соопштението.
Американскиот Стејт департмент претходно денес објави дека дрон го погодил главниот дипломатски објект на САД во Ирак, Центарот за дипломатска поддршка во Багдад, кој се наоѓа веднаш до аеродромот во градот.
Во интерно соопштение од Стејт департментот се наведува дека дронот се урнал во близина на стражарницата на американскиот дипломатски објект.
САД и Израел започнаа напади врз Иран на 28 февруари, откако разговорите за нуклеарната програма на Иран не успеаја да постигнат договор, а истиот ден Иран започна напади врз Израел и соседните земји, тврдејќи дека нападите се должат на американското присуство.
На нападите врз израелски и американски цели во регионот им се придружија и групи поддржани од Иран, како што се Хезболах во Либан и Исламскиот отпор во Ирак, пренесува Танјуг.