Секој потег на администрацијата на Доналд Трамп за промена на американската климатска политика може да биде од корист за амбициите на Австралија да привлече поголеми инвестиции во нејзините клучни индустрии за минерали и зелена енергија, изјави денеска премиерот Ентони Албанес.
Австралија има богати наоѓалишта на бакар, ванадиум, кобалт и литиум што се користат во батериите на електричните возила и се бори за глобални инвестиции за да го изгради својот сектор за чиста енергија, вклучително и преработка на клучни минерали.
Трамп, од друга страна, вети дека ќе го поништи историскиот закон за климата на претседателот Џо Бајден, Законот за намалување на инфлацијата, кој одобрува милијарди долари субвенции за чиста енергија.
„Постојат потенцијални придобивки ако има промени во политиката на САД. Ќе почекаме и ќе видиме што ќе се случи“, им рече Албанес на новинарите во Перу, каде што учествува на самитот на АПЕК.
Австралија ја гледа климатската акција како голема економска можност, рече тој.
„Американскиот акт против инфлација, на пример, доведе до значителен проток на капитал во САД. Ако тие стимулации ги нема, тогаш тоа има импликации за природата на глобалната економија. Ги имаме сите ресурси под земја кои ќе ја движат глобалната економија во 21 век бакар, ванадиум, кобалт, литиум итн. Имаме одлична можност да произведуваме зелен водород користејќи обновливи извори“, рече тој.
Ентони Албанес додаде дека неговиот минатонеделен телефонски разговор со идниот американски претседател Трамп бил „многу конструктивен“.