Во кумановската касарна „Боро Менков“ денеска со воена свеченост беше одбележан Денот на Првиот механизиран пешадиски баталјон, ден кога е формирана и Третата Македонска Ударна Бригада во селото Жегљане во 1944 година.
Во рамките на одбележувањето на настанот припадниците на АРМ продефилираа низ кругот на касарната, а беше изложено и дел од воена опрема и оружје со кое располага единицата.
На прославата зборуваше командантот на Првиот механизиран пешадиски баталјон потполковник Стојанче Костов кој истакна дека денеска единицата е воена сила достојна за почит, која има учествувано во повеќе вежбовни активности во земјата и странство.
– Во изминатата година баталјонот учествуваше на повеќе мировни мисии во земјата и странство и покажа високо ниво на обученост и извежбаност во извршување на борбените задачи во сите временски и теренски услови и во согласност со стандардите на НАТО. За покажаните резултати во обуката и високиот степен на борбена готовност на 1.МПБ му е доделен Орден за заслуги од страна на претседателот на Републиката и врховен командант Ѓорге Иванов на одбележувањето на Денот на армијата, рече потполковник Костов.
Како што додаде командантот Костов во јуни и јули заедно со партнерите од САД ќе се реализира вежбата „Одлучен удар 19“, една од најголемите вежби организирана и реализирана на Криволак.
Командантот на Првата механизирана пешадиска бригада, бригаден генерал Мирче Ѓоргоски во своето обраќање рече дека претстојат големи предизвици, како што е трансформацијата на армијата според новата организациско – трансформациска структура што подразбира интензивирање на реформите.
– Пред нас е и организацијата и учество во најголемата меѓународна вежба во историјата на АРМ во која покрај Армијата на САД, најбројни ќе бидете вие, припадниците на механизираниот пешадиски баталјон. Со беспрекорната реализација на вежбата, но и успешното извршување на задачите кои се пред нас, како и до сега, треба да ве водат неизмерниот патриотизам, професионализмот, храброста и високиот морал. Верувам дека во наредниот период, покрај предизвиците поврзани со реализацијата на големиот број на задачи, ќе направиме и конкретен исчекор кон подобрувањето на стандардот на персоналот и условите за живот и работа, рече бригадниот генерал Ѓоргоски.
На прославата присуствуваа и високи претставници на АРМ, преставници од државна управа, јавните установи и служби, градоначалниците и преставниците на единицате на локалната самоуправа, бизнис секторот и соработниците на Армијата.
На денешната свеченост беа прочитани телеграми со честитки по повод денот на Денот на единицата, беа унапредени, пофалени и наградени припадници на единицата, беше прогласен најдобар вод и беа доделни награди за соработка со медиумите и ЈП „Македонија пат“.
Повеќе фотографии од свеченоста во текот на денот на нашиот Инстаграм профил.