Поранешните вработени во „Медиа принт“, преку отворено писмо до јавноста се обратија до раководството на фирмата во ликвидација“, барајќи си ги своите плати.
– Ние, поранешните вработени во пропаднатата фирма во ликвидација „Медиа принт“ и на ограбената медиумска компанија со матен статус „Медиа принт Македонија“ ги прашуваме Срѓан Керим и Јана Станисављева каде се нашите пари?, се наведува во писмото.
Тие наведуваат дека „овие две личности, нивниот доскорешен партнер Орце Камчев, како и Александар Динев, на вработените во МП, МПМ, Графички центар и во Телеграф им должат по две до три неисплатени плати и придонеси, но пред се, им должат одговори на многу прашања“.
– Дали Керим неколку месеци по уништувањето и згаснувањето на дневните весници „Дневник“, „Утрински весник“ и „Вест“, неделникот „Теа Модерна“ и веб-порталот „Телеграф“ не чувствува трошка срам што 400 луѓе заради него останаа без работа, па се појавува пред народ во Штип за да говори за значењето на претседателот Киро Глигоров? Заборава ли на неговото лично негативно значење и заборава ли дека треба прво да се раздолжи ако мисли да се факторизира во јавноста? Си помислува ли дека историјата ќе го запише како лик кој сакаше да управува со светот преку лидерство во ООН, а само успеа да стане гробар на најквалитетните весници во Македонија?, прашуваат поранешните вработени во МПМ.
Тие натаму го прашуваат Керим „дали мисли дека времето кога се криел од новинарите кои штрајкуваа за плати помина, дека се е заборавено, па сега пак ќе се перчи?“
– За нас тој е обичен измамник и лицемер кој уживаше да повторува како главна водилка во работата му се нашите деца, за чии родители неговата компанија обезбедува стабилност и плата, а всушност излезе дека го водела само алчноста за лично богатење. Дегутантно ни е да го гледаме како говори во јавноста додека неговите акти резултираа со лични трагедии меѓу вработените. Тој прво треба да каже каде се весниците и каде се нашите пари пред да зборува што било друго, наведуваат поранешните вработени.
Тие исто така ја прашуваат и Станисављева дали мирно спие откако со платата од 25.000 евра месечно си обезбеди егзистенција за неколку децении, а вработените останаа на улица и без леб?
– Се чувствува ли за успешна менаџерка откако профитабилната компанија пропадна под нејзин потпис? Трча ли пак со километри од стрес, како што сакаше да лаже? Или во „животот после МПМ“ не мора да намалува плати додека дава донации од 300.000 евра на партијата на власт, не мора да става обезбедување да ја чува од доверители на кои им должи пари и не мора се заканува со пикадо на вработените што се интересираат кога ќе земат плата? Уште ли прашува наоколу „знаете ли која сум јас“ или си молчи откако „се прослави“ со згаснати пет медиуми?, наведуваат тие во писмото.
Според нив, Керим и Станисављева не ни мора нам да ни одговарат на овие прашања, туку да одговорат пред надлежните институции во МВР и Обвинителство, пред кои уште во јуни годинава новинарскиот синдикат им поднесе кривични пријави за злоупотреба на службената положба и овластување, затоа што како сопственик и директор свесно и со умисла го намалувале имотот на компанијата со цел изданијата да згаснат.
– Ние само ги бараме нашите плати и ќе продолжиме да ги прашуваме двајцава бизнисмени, исто како и најбогатиот Балканец Камчев кој ем делел по 25.000 евра месечно ем должи ситни плати, исто како и директорот на несреќната МП, Александар Динев – каде се парите?. наведуваат поранешните новинари и вработени од МПМ и МП.
Тие апелираат до надлежните што поскоро да го испитаат моментниот статус на фирмите МПМ и на МП, а горенаведените личности ги повикуваат да се раздолжат со вработените и да ги продадат брендовите кои, како што велат, немилосрдно ги уништија.
Извор: МИА