На градскиот плоштад во Куманово победа слави кандидатот за градоначалник од редовите на СДСМ, Максим Димитриевски заедно со кандидатите за советници, сопратијци, симпатизери и граѓани. Пред прославата на градскиот плоштад, Димитриевски во изјава за медиумите посочи дека согласно пребројаните резултати во Општинскиот изборен штаб, води пред останатите кандидати.
– Првите информации кои што стасаа во штабот се дека СДСМ, со своите коалициски партнери и со граѓаните на општина Куманово, денеска се избори за една голема историска победа во општина Куманово. Ја добивме апсолутната поддршка од сите граѓани и заедно со граѓаните ги надминавме сите стереотипи. Буквално сите граѓани се одлучија за проектот и за концептот за живот во Куманово и во Македонија, рече Димитриевски.
Тој им се заблагодари на сограѓаните кои, како што рече, излегоа денеска на избори и најдостоинствено и на демократски начин ја дадоа својата поддршка за живот во Куманово.
– Воедно ми дадоа можност, чест и одговорност во следните четири години да го менаџирам нашиот град и ги увреувам дека она што беше дадено како ветување, она што беше ветено и презентирано во изборната програма ќе биде во целост реализирано во најбрз период. Тука пред се очекувам помош од Владата предводена од Зоран Заев и неговиот тим, изјави Димитриевски.
Тој истакна дека не може да процени колку советници ќе има, но оти во општинскиот совет ќе имаат мнозинство.
https://www.facebook.com/kumanovskimuabeti1/videos/2017494428472794/
Извор: МИА / Видео: Кумановски Муабети