КУД „Панче Пешев“ ќе одбележи 90 години од постоењето

Културно-уметничкото друштво „Панче Пешев„ оваа година слави 90 години постоење и успешна работа.

Големиот јубилеј, едно од најстарите друштва во државата ќе го одбележат со голема прослава на средината на наредниот месец. Mанифестацијата ќе трае 3 дена, поточно од 20. до 22. октомври, со повеќе активности.

„Програмата ќе започне во четврток со дефиле на играорците низ централното градско подрачје во попладневните часови, по што во Центарот на култура ќе се отвори етно изложба, на која ќе бидат изложени носии, фотографии, награди и признанија за активностите на друштвото. Истиот ден од 19 часот ќе биде организирана и богата фолклорна вечер со 5 културно-уметнички друштва од државата и странство. Учество ќе земат домаќините КУД „Панче Пешев„ Фолклорен ансамбл Битола и фолклорно студио „Етнос„ од Скопје, КУД „Шумандија“ од Горњи Милановац, Србија и фолклорен ансамбл „Варна„ од Варна, Република Бугарија.Секое од друштвата ќе настапи со по две кореографии и дел од пејачки група, како и естрадни уметници. Ќе понудиме една богата културна вечер со квалитетна програма на игри, песни и фолклор од регионот„, – вели претседателот на КУД „Панче Пешев“, Мирослав Крстевски.

Втората вечер е предвидена за промоција на монографијата 90 години КУД „Панче Пешев„ и Свечената седница.Промотор на монографијата ќе биде Катарина Петровска, професор на Институт за фолклор. На свечената седница покрај обраќањето на претседателот ќе следи и богата културно-уметничка програма.

На последниот ден, односно затворањето на прославата, ќе биде отворен етно клуб на КУД „Панче Пешев„ во бавчата на комплексот Грација и во исто време ќе бидат доделени благодарници и признанија на сите учесници на друштвото во последните 10 години.

За одржување на манифестацијата формиран е иницијативен одбор, кој работи на подготовки за големиот јубилеј.

Манифестацијата се одржува под покровителство на Општина Куманово.