Украинскиот претседател Володимир Зеленски денеска изјави дека во текот на минатата недела Русија лансирала околу 1.900 дронови, речиси 1.400 наведувани воздушни бомби и околу 60 проектили од различен тип на Украина.
– Ова укажува на тоа колку се навремени придонесите на новите партнери во иницијативата Приоритетна побарувачка листа на Украина (PURL), како и одобрувањето на 20-тиот пакет санкции на ЕУ и европскиот пакет за поддршка од 90 милијарди евра, договорен на Кипар. Им благодарам на сите наши партнери кои помагаат – рече Зеленски во објава на платформата Х.
Тој рече дека украинскиот систем за противвоздушна одбрана „веќе покажува многу висока стапка на успех во пресретнувањето на беспилотни летала – над 90 проценти“.
– И ние мора да продолжиме да работиме за да се осигураме дека оваа стапка ќе продолжи да се зголемува, не само против беспилотните летала, туку и против балистичките закани. Секоја дополнителна испорака на ракети за противвоздушна одбрана значи спасени животи и подобра заштита на нашите градови и критична инфраструктура – нагласи Зеленски.